Ակցիա՝ ԱՄՆ դեսպանատան մոտ ընդդեմ բիոլաբորատորիաների գաղտնի գործունեության

«Հայաստանի Հանրապետությունը փորձադաշտ չէ», «հայ մարդը փորձարկման նմուշ չէ»։ Այսպիսի կարգախոսներով այսօր ընդդեմ բիոլաբորատորիաների գաղտնի գործունեության բողոքի ակցիա անցկացվեց ՀՀ-ում ԱՄՆ դեսպանատան մոտ, որը կազմակերպել են «Ընդդեմ բիոլաբորատորիաների գործունեության» նախաձեռնությունը և «Ալյանս» կուսակցության երիտասարդական միությունը։ Տեղեկացնում է Panorama.am-ը։
«Հավաքվել ենք այստեղ ներկայացնելու մեր պահանջները, մոտեցումներն այն առումով, որ Հայաստանում կենսաբանական զենք չպետք է լինի։ Վերջերս ռուս-ուկրաինական պատերազմի ժամանակ ռուսական զորքերի կողմից հայտնաբերվեցին կենսաբանական «լաբորատորիաներ», որտեղ արտադրվում էր կենսաբանական զենք։ Որոշ երկրների կողմից աշխարհաքաղաքական նկրտումները բավարարելու համար էին, ըստ էության, արտադրվում այդ կենսաբանական զենքերը։
Մինչ այդ  բոլորն էլ կարծում էին, որ դրանք կենսաբանական լաբորատորիաներ են, որևէ մեկը չէր մտածում, եթե չբացահայտվեր, որ  այդտեղ արտադրվում է կենսաբանական զենք»,- նշեց ակցիայի մասնակիցը։
Նրա խոսքով, հիմա Հայաստանում ևս գործում են կենսաբանական լաբորատորիաներ. «Կարծեմ՝ 12, որից երեքը Երևանում, մնացածը շրջաններում։ Կասկածներ ունենք, որ արտադրվում է կենսաբանական զենք։ Պահանջը հետևյալն  է՝ խնդրել պատասխանատուներին  թույլ տալ միջազգային մոնիթորինգ։
Եթե մղումներն արդար են, եթե իրապես կենսաբանական լաբորատորիաներ են, գործունեության մեջ որևէ խնդիր չենք տեսնում, բայց բանն այն է, որ թե իշխանությունները, թե  այդ լաբորատորիաների տարբեր շահառուներ պարբերաբար խոչընդոտում են, որ այդտեղ չանցկացվի միջազգային մոնիթորինգ։

Ակցիայի մասնակիցները նամակ փոխանցեցին ԱՄՆ դեսպանատուն՝ ստանալու իրենց հուզող հարցերի պատասխանները։