ԵՄ առաջնորդները համաձայնել են Ուկրաինայի հետ ստեղծել համերաշխության հավատարմագրային հիմնադրամ
Եվրամիության պետությունների և կառավարությունների ղեկավարները պայմանավորվել են ստեղծել Ուկրաինայի հետ համերաշխության հավատարմագրային հիմնադրամ՝ ռուսական ռազմական գործողության ավարտից հետո երկրի վերականգնումը ֆինանսավորելու համար։ Այս մասին ասված է ԵՄ գագաթնաժողովի հայտարարության մեջ, որի առաջին օրն ավարտվել է Բրյուսելում։ Գրում է ՏԱՍՍ-ը:
«Հաշվի առնելով Ռուսաստանի ռազմական ագրեսիայի հետևանքով Ուկրաինային հասցված ավերածությունները և հսկայական կորուստները՝ Եվրամիությունը հավատարիմ է աջակցելու Ուկրաինայի կառավարությանը՝ բավարարելու իր հրատապ կարիքները և, երբ ռուսական հարձակումը դադարեցվի, վերականգնելու ժողովրդավարական Ուկրաինան: Այս նպատակով Եվրոպական խորհուրդը համաձայնում է ստեղծել Ուկրաինայի հետ համերաշխության նպատակային հիմնադրամ և հրավիրում է իր միջազգային գործընկերներին մասնակցելու, ինչպես նաև կոչ է անում նախապատրաստական աշխատանքները սկսել առանց հապաղելու»,- ասվում է հայտարարության մեջ։
Փաստաթղթում ընդգծվում է, որ Եվրամիությունը կշարունակի Ուկրաինային ցուցաբերել քաղաքական, ֆինանսական, նյութական և հումանիտար աջակցություն։
Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին։
