«ԱրմՀայԹեք 2022» ցուցահանդեսի շրջանակում Երևանում տեղի կունենա ՀԱՊԿ գործադիր մարմնի նիստը

Մարտի 31-ից ապրիլի 2-ը Կարեն Դեմիրճյանի անվան մարզահամերգային համալիրում տեղի կունենա «ԱրմՀայԹեք 2022» պաշտպանական տեխնոլոգիաների 3-րդ միջազգային ցուցահանդեսը: Տեղեկությունը հայտնում է ՀՀ բարձր տեխնոլոգիական արդյունաբերության նախարարությունը։

Նշվում է, ոչ պաշտպանական և տեխնոլոգիական ոլորտի մասնագիտացված այս միջոցառմանը կմասնակցեն ՀԱՊԿ և մի շարք այլ երկրների հատուկ տեխնիկական սարքավորումների, անվտանգության համակարգերի առաջատար ընկերություններ։

«Միջոցառման շրջանակում տեղի կունենա ՀԱՊԿ խորհրդի գործադիր նիստը»,–նշված է հաղորդագրության մեջ։

Բացի այդ, միջոցառմանը ներկա կգտնվեն նաև գերատեսչությունների ղեկավարներ, պաշտպանական և անվտանգային տեխնոլոգիաների ոլորտի ներկայացուցիչներ, տարբեր երկրների մասնագետներ, բազմաթիվ այցելուներ։

Ցուցահանդեսի նպատակն է խթանել ժամանակակից տեխնոլոգիաներն ու ծառայությունները, ստեղծել համագործակցային նոր կապեր, ամրապնդել գործընկերային հարաբերություններ, գտնել նոր գործընկերներ և ներդրողներ։

Հիշեցնենք, որ «ԱրմՀայԹեք»-ն անցկացվում է երկու տարին մեկ: Առաջին նման ցուցահանդեսը տեղի է ունեցել 2016-ին, երկրորդը՝ 2018-ին:

2020-ի մարտին պետք է կայանար հերթական միջոցառումը, որը կորոնավիրուսի հետևանքով հետաձգվեց մինչ հոկտեմբեր, սակայն հոկտեմբերին էլ 44-օրյա պատերազմի մեջ էինք։ Այն հետաձգվել էր մինչև 2021-ի մարտ, և կրկին համավարակի պատճառով հետաձգվեց մեկ տարով։