Երկրի զարգացմանը խոչընդոտող մի շարք խնդիրներ կան․ ՀՀ նախագահի թեկնածուն թվարկեց դրանք
Մարտի 2-ին ԱԺ նիստում հանրապետության նախագահի միակ թեկնածու, Բարձր տեխնոլոգիական արդյունաբերության նախարար Վահագն Խաչատրյանն ասաց, որ կան մի քանի հիմնախնդիրներ, որոնք մինչ օրս լուծված չեն և խանգարում են երկրի զարգացմանը՝ տարածաշրջանային համագործակցության սահմանափակումներ և դրա ընդլայնման անհրաժեշտություն, իրականության հետ առնչվող համարձակություն և պատրաստակամություն, իրական իրավիճակները գնահատելու ունակություն, սպասվող մարտահրավերներին դիմակայելու հանձնառություն և պատասխանատվություն, ապագային միտված ծրագրերի իրականացում, որոնք իրենց բնույթով և նշանակությամբ պետք է լինեն ոչ միայն պետական, նաև համազգային։
«Վերը թվարկած հիմնախնդիրները կարելի է լուծել, երբ բոլորիս մոտ լինի գիտակցում, որ միասին մենք կարող ենք բարգավաճել ընդհանուր լավատեսության և հույսի պայմաններում։ Միասնությունը ուժի, պատվի և ընդհանուր բարիքի ճանապարհն է»,- ասաց Վահագն Խաչատրյանը՝ ընդգծելով, որ առաջ շարժվելու, այս դժվարությունները հաղթահարելու այլընտրանք չունեն, միասնությունն ու միասնականությունը կարող են դրա գրավականը լինել։