Օդանավակայաններում ծառայություններ մատուցելու համար տաքսիստները պետք է լիցենզիա ունենան

Հայաստանի կառավարության օրենսդրական նախաձեռնությունը վերաբերելու է միայն հանրապետական օդանավակայանների տարածքում գտնվող տաքսի ծառայություններին։ Այս մասին Ազգային ժողովի հունվարի 17-ի նիստում, «Ավտոմոբիլային տրանսպորտի մասին» օրենքում և հարակից օրենքներում փոփոխություններ և լրացումներ մտցնելու մասին օրինագծերի փաթեթի քննարկման ժամանակ ասաց տարածքային կառավարման և ենթակառուցվածքների փոխնախարար Արմեն Սիմոնյանը։

Փոփոխությունների համաձայն՝ Հայաստանի օդանավակայաններում գործելու են միայն սպիտակ գույնի տաքսիներ՝ գործարանային վառելիքային համակարգով։ Այսինքն՝ համակարգը չպետք է վերասարքավորված լինի բենզինի փոխարեն գազի օգտագործման համար։ Բացի այդ, դրանց արտադրության թիվը չպետք է գերազանցի 7 տարին։

Բացի դրանից, տաքսիների վրա պետք է տեղադրված լինեն համապատասխան տարբերանշաններ, իսկ կողքին՝ «Aerotaxi» գրություն։

Տրանսպորտային միջոցների վարորդները, որոնք կհամապատասխանեն նորմերին, կստանան «А» դասի լիցենզիա, որի տարեկան տուրքը կկազմի 200 հազար դրամ։ Տուրքի այսքան մեծ չափը պայմանավորված է Երևանից օդանավակայան տեղափոխման բավական բարձր սակագներով, իսկ ուղևորները որպես ավելի մատչելի այլընտրանք կկարողանան օգտվել միկրոավտոբուսներից, որոնք կանոնավորապես երթևեկում են օդանավակայան-Հանրապետության հրապարակ երթուղով։

Նշված պահանջները խախտելու և լիցենզիա չունենալու դեպքում տաքսու սեփականատերերից կգանձվի 50 հազար դրամ տուգանք։

Իսկ սովորական տաքսիները կտուգանվեն միայն այն դեպքում, եթե զբաղեցնեն լիցենզավորված մեքենաների կայանատեղիներն օդանավակայանում։

Այս փոփոխություններն ուժի մեջ կմտնեն ոչ անմիջապես, այլ խորհրդարանում դրանց ընդունումից և պաշտոնական հրապարակումից կես տարի հետո։