Ռուսաստանը սպասում է Արևմուտքի պատասխանին․ ԱՄՆ-ում ՌԴ դեսպան
Մոսկվան Վաշինգտոնից և նրա դաշնակիցներից սպասում է հիմնավորված գրավոր պատասխան՝ եվրոպական անվտանգության վերաբերյալ առաջարկներին, ասել է ԱՄՆ-ում Ռուսաստանի դեսպան Անատոլի Անտոնովը։ Գրում է «ՌԻԱ Նովոստին»:
«Մենք ներկայացրել ենք իրավիճակը ճգնաժամից դուրս բերելու մեր նախաձեռնությունները, հունվարի 10-ին դրանք բացատրել ենք Ժնևում, իսկ հունվարի 12-ին՝ Բրյուսելում Ռուսաստան-ՆԱՏՕ խորհրդի շրջանակներում: Սպասում ենք համարժեք պատասխանի, բայց ոչ պոպուլիստական հայտարարությունների, այլ հիմնավորված գրավոր առաջարկների տեսքով»,- ասել է դիվանագիտական առաքելության ղեկավարը:
Անտոնովի խոսքով, Վաշինգտոնն ի վիճակի չէ բանակցություններում փաստարկներով պաշտպանել իր տեսակետը։
«Տպավորություն է ստեղծվում, որ ամերիկյան քաղաքական գործիչները մամուլի միջոցով առաջ են քաշել «Ուկրաինա ռուսական մոտալուտ ներխուժման» առասպելը և այժմ հաղթահարում են սեփական վախերը։ Ավելին, մեր երկրին ավելի ցավոտ «պատժելու» օրենսդիրների պահանջների հետևում թաքնված է Ռուսաստանի վրա ազդելու փորձ՝ եվրոպական անվտանգության շուրջ ընթացող բանակցությունների ֆոնին»,- հավելել է դեսպանը։
Նախօրեին Բրյուսելում կայացել է Ռուսաստան-ՆԱՏՕ խորհրդի նիստ, մինչ այդ երկուշաբթի օրը Ժնևում երկկողմ բանակցություններ են տեղի ունեցել Ռուսաստանի և ԱՄՆ-ի պատվիրակությունների միջև։
Կրեմլը պնդում է դադարեցնել դաշինքի ռազմական համագործակցությունը հետխորհրդային երկրների հետ՝ հրաժարվելով նրանց տարածքում բազաներ ստեղծելուց, սահմանափակելով հարվածային զենքի տեղակայումը Ռուսաստանի սահմանի մոտ, հեռացնելով ամերիկյան միջուկային զենքը Եվրոպայից և երաշխավորելով ՆԱՏՕ-ի չընդլայնումը դեպի արևելք։
Այսօր Վիեննայում ԵԱՀԿ Մշտական խորհրդի նիստի շրջանակներում կշարունակվեն խորհրդակցությունները։