Փարաքարում համայնքապետարանի մոտ լարված իրավիճակ է․ բախման հետևանքով քաղաքացին և ոստիկանը ուշաթափվել են (տեսանյութ)
Փարաքարի համայնքապետարան քաղաքացիների ներխուժման հետևանքով այսօր` հունվարի 7-ին, բախում է տեղի ունեցել քաղաքացիների և ոստիկանների միջև:
NEWS.am-ի տեսախցիկը ֆիքսել է, թե ինչպես է քաշքշուկից հետո վատանում ոստիկանի և քաղաքացու ինքնազգացողությունը, նրանք ուշաթափվում են:
Ոստիկանները բիրտ ուժ կիրառելու միջոցով քաղաքացիներին հեռացնում են համայնքապետարանի շենքից, ուր քիչ անց մեկնարկելու էր ավագանու նիստը:
Նշենք, որ դրանից հետո ոստիկանները պատ են կազմում, որպեսզի չթույլատրեն քաղաքացիների մուտքը համայնքապետարան:
Հիշեցնենք, որ դեկտեմբերի 5-ին կայացած ՏԻՄ ընտրությունների արդյունքում Փարաքար համայնքում «Ապրելու երկիր» կուսակցությունը 21 հոգանոց ավագանիում ստացել է 10 մանդատ և 10 ձայնով իրենց թեկնածուն՝ Վոլոդյա Գրիգորյանը ընտրվել է համայնքի ղեկավար: Թեև 10 ձայնը 50 տոկոսից քիչ է, սակայն «Ապրելու երկիր» կուսակցությունը պնդում է, որ եթե առաջադրված է մեկ թեկնածու, ապա նա կարող է ընտրվել 40+ տոկոս ձայներով:
Դրանից հետո եկել էին ավագանու մնացած 11 անդամները և 11 ձայնով համայնքապետ էր ընտրվել Դավիթ Մինասյանը, որը «Դավիթ Մինասյան» դաշինքի թեկնածուն է: Նրան էին ընտրել նաև ՔՊ-ի անդամները:
Դեկտեմբերի 23-ին «Ապրելու երկիր» կուսակցության աջակիցները հավաքվել էին Փարաքարի մշակույթի տան բակում, որտեղ պետք է տեղի ունենար իրենց թեկնածուի երդմնակալությունը, սակայն ոստիկանները նրանց թույլ չէին տվել մտնել շենք, և երդմնակալությունը դրսում էր կազմակերպվել:
Նույն օրն էլ «Դավիթ Մինասյան» դաշինքը դատարան հայց էր ներկայացրել՝ ընտրությունների արդյունքները անվավեր ճանաչելու պահանջով: Վարչական դատարանը որոշում է կայացրել անվավեր ճանաչել Փարաքար համայնքի ղեկավարի ընտրությունների արդյունքները։
NEWS.am-ի տեսանյութը