Ալիևը հանձնարարել է քննարկել Արցախի օկուպացված տարածքներում ջրամբարների կառուցման հարցը
Ադրբեջանի նախագահ Իլհամ Ալիևը հանձնարարել է քննարկել Արցախի օկուպացված տարածքներում ջրամբարների կառուցման հարցը: Այդ մասին Ալիևն ասել է «Մելիորացիայի և ջրի կառավարման» ԲԲԸ նախագահ Զաուր Միկայիլովի հետ տեսակապով տեղի ունեցած հանդիպման ընթացքում, հաղորդում են ադրբեջանական ԶԼՄ-ները:
Նշելով, որ այդ տարածքներում ջրամբար կա, Ալիևը հայտարարել է, որ պետք է վերլուծել, թե դրանք ինչ վիճակում են: Նրա խոսքով՝ պետք է «ճիշտ վերլուծություն անել՝ կապված գետերի հունի հետ, որպեսզի ռացիոնալ օգտագործվեն այդ գետերը»: Դրանցից շատերը թափվում են Արաքս գետը:
«Իհարկե, ամենախոշոր աղբյուրներն Իրանի հետ սահմանին գտնվող Խուդաֆերինի և Գիզ Գալասի ջրամբարներն են: Խուդաֆերին ջրամբարի ծավալը կազմում է 1,6 մլրդ խմ: Դրա օգտագործման համար, իհարկե, պետք է հավելյալ ենթակառուցվածքային նախագծեր իրագործել»,-ասել է նա:
