Արաքս-Ախուրյան հատվածում ջրային ռեսուրսների խնդիր կա՝ պայմանավորված Թուրքիայում ջրամբարաշինությամբ. Լևոն Ազիզյան
Արաքս-Ախուրյան հատվածում կա ջրային ռեսուրսների խնդիր՝ պայմանավորված Թուրքիայում ջրամբարաշինությամբ: Այս մասին ասուլիսում ասաց «Հիդրոօդերևութաբանության և մոնիտորինգի կենտրոն» ՊՈԱԿ-ի տնօրենի պաշտոնակատար Լևոն Ազիզյանը:
«Պատահական չէ, որ այսօրվա դրությամբ Ախուրյանի ջրամբարում նախորդ տարվա համեմատ 100 միլիոն խորանարդ մետրով պակաս ջուր ունենք: Սկսած 2012 թվականից՝ Թուրքիայում ջրամբարաշինությամբ պայմանավորված, Արաքս գետի ջրային ռեսուրսները զգալիորեն՝ մոտ 30-40 տոկոսով նվազել են»,- նշեց նա:
Լ. Ազիզյանն ասաց, որ լուրջ խնդիր է կլիմայի փոփոխությամբ պայմանավորված ջրային ռեսուրսների խոցելիությունը, քանի որ ջերմաստիճանի շարունակական աճ է գրանցվում 1994 թվականից ի վեր, ամեն տարի ջերմաստիճանը նորմայից բարձր է, լեռնային շրջաններում տեղումները հիմնականում անձրևի տեսքով են, ձնակուտակման պրոցես քիչ է տեղի ունենում:
«Կանխատեսումների համաձայն, 2040 թ. ունենալու ենք ջրային ռեսուրսների խոցելիություն՝ նորմի նկատմամբ նվազում մոտ 15 տոկոսով, 2070-ին՝ 20-25 տոկոս նվազում, 2100-ին՝ կանխատեսվում է մոտ 35-40 տոկոս նվազում»,- ասաց նա:
Լևոն Ազիզյանն ընդգծեց՝ ջրի ամեն մի կաթիլ պետք է խնայողաբար օգտագործել: