Արայիկ Հարությունյանը Կամո Աղաջանյանի համար Երևանում շքեղ գրասենյակ է վարձակալել և 20 մլն դրամի կահույք գնել. ինչից է վախենում Արցախի նախագահը. politik.am

Politik.amը գրում է. «Արցախի Հանրապետությունն այս ծանրագույն վիճակում է հայտնվել ոչ միայն պատերազմում արձանագրված պարտության պատճառով, այլ նաև այն պատճառով, որ երկրի ղեկը գտնվում է քաղաքականապես զրո նշանակություն ունեցող, առևտրական և սարսափելի վախկոտ Արայիկ Հարությունյանի ձեռքում:

Այն, որ Արայիկ Հարությունյանը անսկզբունք և վախկոտ է՝ նկատելի էր իր առաջին իսկ նշանակումներից: Հարությունյանը նախագահ դառնալուց հետո փորձում էր բավարարել իր բոլոր քննադատներին: Նա պաշտոններ բաժանելով՝ փորձեց լռեցնել բոլորին, որպեսզի ինքն էլ հանգիստ շարունակի Արցախի նախագահի կարգավիճակով իր բիզնեսներն առաջ տանել:

Պատերազմից հետո Արայիկ Հարությունյանն առավել խոցելի վիճակում է հայտնվել և հիմա իր խամաճիկային էությունն առավել նկատելի է: Երկար ժամանակ ջանքեր թափելուց հետո նա համարձակություն գտավ և աշխատանքից ազատեց Արցախի ԱԱԾ ղեկավար Կամո Աղաջանյանին: Թվում էր, թե ի վերջո Հարությունյանը քաջություն է ձեռք բերել և կարող է ինքնուրույն որոշումներ կայացնել, բայց կարճ ժամանակ անց նա ապացուցեց, որ շարունակում է նույն առևտրականը մնալ:

ԱԱԾ պետի պաշտոնից ազատելուց հետո, Հարությունյանը կարճ ժամանակ անց Կամո Աղաջանյանին նշանակեց Հայաստանի Հանրապետությունում Արցախի Հանրապետության նախագահի ներկայացուցիչ՝ հատուկ հանձնարարությունների գծով: Կամո Աղաջանյանին լռեցնելու համար Արայիկ Հարությունյանը պետության հաշվին Երևանի Զաքյան փողոցի բիզնես կենտրոններից մեկում շքեղ գրասենյակ է վարձակալել (Արայիկ Հարությունյանը Երևանում լինելու դեպքում հենց այդ գրասենյակում է իր հյուրերին ընդունում) և շքեղ կահավորում ապահովել: Արցախի կառավարության մեր աղբյուրները տեղեկացնում են, որ միայն կահույքի համար վճարվել է ավելի քան 20 մլն դրամ:

Արայիկ Հարությունյանը խոստացել է Կամո Աղաջանյանին մասնակից դարձնել որոշ բիզնեսների, որոնք իրեն կամ իր մերձավորներին են պատկանում:

Հետաքրքիր է, թե ինչպե՞ս կվերաբերվեն արցախցիները սեփական կաշին փրկելու համար պետական միջոցները վատնելու Արայիկ Հարությունյանի արատավոր այս պրակտիկան: Ցավալի է, որ Արայիկ Հարությունյանը նույն փութաջանությամբ չի փորձում  անօթևան մնացած արցախցիների խնդիրները լուծել:

Հ.Գ. Այստեղ իհարկե առանձնահատուկ բարոյականությամբ չի փայլում նաև Կամո Աղաջանյանը, ով աղետի մեջ հայտնված պետության միջոցների հաշվին շռայլ կյանք է վարում»: