Իմ տարիքի տղերքը Եռաբլուրում են… 20 տարեկան եմ, պարոն Աշոտյան…
Այսօր Ազատության հրապարակում և Բաղրամյան փողոցում շփվեցի բազմաթիվ հայրենասեր ու շատ տարբեր մարդկանց հետ։ Տարբեր մարզերից, տարբեր տարիքի, քաղաքական պատկանելության, կրթության ու սոցիալական վիճակի։
Մարդկանց թվում էր, թե ես էի պատասխանում նրանց մտահոգություններին և հարցերին, այնինչ ես սովորում էի նրանցից, քաշում նրանց շատ պարզ, իրական և ճշմարիտ հայրենասիրությունը։
Շատ երկխոսություններ կարելի էր հանրայնացնել։ Բայց այս մեկը դաշույնի պես մխրճվեց իմ հոգեկան աշխարհի մեջ։
Երիտասարդ տղաների մի խումբ մոտեցավ, ծանոթացանք, խոսեցինք։
Մեկին հարցրեցի.
– Քանի՞ տարեկան ես, տղես։
– Իմ տարիքի տղերքից շատերը մեռել են։
Դրսի ցո՞ւրտն էր բթացրել ընկալունակությունս, թե երիտասարդ տղայի շուրթերից նման նախադասություն չէի սպասում՝ չգիտեմ։
Նա, երևի տեսնելով իմ տարակուսած հայացքը, հավելեց.
– Իմ տարիքի տղերքը Եռաբլուրում են… 20 տարեկան եմ, պարոն Աշոտյան…
Արմեն Աշոտյանի ֆեյսբուքյան էջից
