ԱՄՆ-ը հրաժարվել է մասնակցել Սոչիում անցկացվող սիրիական հարցի մասին միջազգային խորհրդաժողովին
ԱՄՆ-ը հրաժարվել է մասնակցել Սոչիում անցկացվող սիրիական հարցի լուծման միջազգային խորհրդաժողովին: Այս մասին հայտարարել է Սիրիայի հարցով Ռուսաստանի նախագահի հատուկ ներկայացուցիչ Ալեքսանդր Լավրենտևը:
«Մենք հրավեր ենք ուղարկել մեր ամերիկացի գործընկերներին` մասնակցելու համաժողովին, բայց, ցավոք, մերժում ենք ստացել»,- ՏԱՍՍ-ին ասել է Լավրենտիևը:
Նրա խոսքով՝ այս պահին Միացյալ Նահանգներում հիմնական շեշտադրումը ներքին պետական գործերի վրա է, իսկ սիրիական ուղղությամբ տեսակետը դեռ որոշված չէ:
Ավելի վաղ Ռուսաստանի արտգործնախարար Սերգեյ Լավրովը ՄԱԿ-ի գլխավոր քարտուղար Անտոնիո Գուտերեշի հետ քննարկել էր Սիրիայում տիրող իրավիճակը: Նրանք «հատուկ ուշադրություն են դարձրել Սիրիայի առկա իրավիճակի կարգավորմանը, ընդգծելով ամբողջ երկրում կարիքավորների միջազգային մարդասիրական օգնության ակտիվացման անհրաժեշտությունը»՝ մարդասիրական օգնության ուղեցույցներին խիստ համապատասխան, առանց քաղաքականացման և նախապայմանների:
