ՀՀ քաղաքացիների թիվը Թուրքիայում 2020-ին նվազել է շուրջ 30 տոկոսով
Թուրքիայի վիճակագրական կազմակերպությունը (TÜİK) հրապարակել է 2020 թվականին Թուրքիայի բնակչության թվի վերաբերյալ տվյալներ, որոնք մշակվել են ըստ բնակության հասցեների։ Այս մասին հայտնում է Ermenihaber.am-ը։
Հրապարակված տվյալների համաձայն՝ Թուրքիայում բնակություն հաստատած օտարերկրացիների թիվը ի տարբերություն նախորդ տարվա, 2020-ին նվազել է 197 հազար 770 մարդով (13 տոկոսով)՝ այն կազմելով 1 միլիոն 333 հազար 410։
Ինչպես նախկինում, 2020-ին նույնպես Թուրքիայում բնակություն հաստատած օտարերկրացիների թվով Իրաքի քաղաքացիներն առաջատար են: Նրանց թիվը 281 հազար 74 է: Իրաքցիներին հաջորդում են Աֆղանստանի քաղաքացիները՝ 158 հազար 252 բնակչությամբ: Ցանկում երրորդն են Գերմանիայի քաղաքացիները (92 հազար 284):
Զգալի թիվ են կազմում նաև Թուրքմենստանի, Սիրիայի, Իրանի և Ադրբեջանի քաղաքացիները:
Նշվում է, որ 2020-ին ամենից շատ բնակություն են հաստատել Աֆղանստանի քաղաքացիները: Աճել է նաև Գերմանիայի, Ավստրալիայի, Բուլղարիայի, Անգլիայի, Հունաստանի, Դանիայի, Ռուսաստանի, Կանադայի, Շվեյցարիայի, Քուվեյթի և Սոմալիի քաղաքացիների թիվը: Իսկ ԱՄՆ-ի, Ուկրաինայի, Մոլդովայի, Շվեդիայի, Նորվեգիայի, Իտալիայի, Ռումինիայի, Բելգիայի, Ֆրանսիայի, Սիրիայի, Իրաքի և Իրանի քաղաքացիների թիվը նվազել է:
Հատկանշական է, որ Քաթարի քաղաքացիների թվի աճի ցուցանիշը, չնայած թուրք-քաթարական հարաբերությունների անընդմեջ զարգացման ֆոնին սակավ է, ընդամենը 711: Նախորդ տարի նրանց թիվը 676 էր:
2020 թ. Թուրքիայում բնակություն հաստատած ՀՀ քաղաքացիների թիվը զգալիորեն նվազել է՝ 1760-ից դառնալով 1257:
Կտրուկ նվազել է Կուբայի քաղաքացիների թիվը՝ 528-ից դառնալով 261:
