Դեժավյու. 2007 թ.
Պատառիկ Սերժ Սարգսյանի հետ հարցազրույցից
– Կարո՞ղ եմ երկու ճակատային հարց տալ, պարոն Սարգսյան:
– Ինչո՞ւ չէ:
– Ինչպիսի՞ն են Ձեր հարաբերությունները Ռոբերտ Քոչարյանի հետ:
– Ինչպիսին լինում են այն մարդկանց հարաբերություները, որոնք միմյանց հետ երկար ճանապարհ են անցել. անցել են կրակի, շատ փորձությունների միջով: Այդպիսին: Կարծում եմ` դուք էլ կասկած չունեք, որ այդպիսին է:
– Հաջորդ «ճակատայինը». իսկ հնարավո՞ր է, որ Դուք առաջիկա նախագահական ընտրություններում Ձեր թեկնածությունը չդնեք, ինչպես «ենթադրում են» որոշ փորձագետներ:
-Չեմ կարծում: Համենայնդեպս, կլինի մեր կուսակցության համագումարը, և կուսակցությունը կկայացնի իր որոշումը:
-Մեկ հատ էլ վատ հարց, լա՞վ:
-Լավ: Չնայած չեմ հասկանում, թե վատ հարց ինչո՞ւ են տալիս:
-Այդպես հետաքրքիր է: Ահաև. որոշ փորձագետներ էլ տեսակետ են հայտնում, որ եթե ընդդիմությունը չզարթնի, նախագահականի միանշանակ ֆավորիտն ու «ընտրյալը» Դուք կլինեք: Մի ասեք, որ «եթեներով» հարցերի չեմ պատասխանում: Եվ այնուհանդերձ, եթե Դուք լինեք նախագահ, համամիտ կլինե՞ք, որպեսզի Քոչարյանի փորձն օգտագործվի վարչապետի պաշտոնում:
-Այդպիսի խնդիր չկա: Այդ մասին Ռոբերտ Քոչարյանը շատ հստակորեն ասել է. որ նման հարց գոյություն չունի: Ռոբերտ Քոչարյանն ինքը պետք է որոշի, թե իր փորձը որտեղ է օգտակար… Լավ հարցերի հերթը դեռ չեկա՞վ:
– Եկավ, բայց նախ մեկ դիտարկում. տեսակետ կար, որ Դուք առանձնապես հումոր անել չեք սիրում, կարծես թե ստացվում է: Այսպիսով, լավ հարց` այսօր Ձեր ծննդյան օրն է, ինչպես և որտեղ եք այն անցկացնելու:
– Համենյանդեպս, ոչ աշխատանքի վայրում:
– Սիրո՞ւմ եք ծննդյան օրեր, և ո՞ւմ միջավայրում եք այն անցկացնում:
– Երևի թե սիրել-չսիրելու խնդիր չկա. ընդունված է պարզապես, որ այդ օրերը քիչ պետք է աշխատես, լինես բարեկամների, ընկերների շրջապատում, և այնպես անես, որ քիչ նեղության տաս ուրիշներին:
– Ձեր հիսնամյակը դուք տոնեցիք Ռուսաստանում, ինչո՞ւ:
– Այդպե՞ս է եղել որ: Չեմ հիշում: Ես ճիշտն ասած` չեմ տոնել իմ հիսնամյակը. հատուկ տոն, խնջույք, որպես այդպիսին, չի եղել: Հնարավոր է իրերի բերումով ես լինեի ցանկացած տեղում: Հատուկ այդպիսի նպատակ, որ գնամ մի տեղ ծննդյան օր նշելու, անհնար է:
– Պարոն Սարգսյան, տիեզերակարգն ասում է, որ Դուք խեցգետին եք` ձիով: Խեցգետինները, ի դեպ, ամենաառեղծվածայինն են բոլոր նշաններից: Դուք ձեզ ուսումնասիրե՞լ եք որպես անհատ, տեսակ: Ի՞նչն է Ձեր մեջ գերիշխում:
– Երևի թե բաց լինելը:
– Ինչը~…
– Առեղծվածային չլինելը:
– Վատ հարց առաջացավ. փորձագետների մեծ մասը ձեզ համարում է «գորշ կադինալ»:
– Գիտե՞ք, մարդու մասին շատ ու շատ կարծիքներ կարող են լինել, և ամենևին պարտադիր չէ, որ այդ կարծիքները համապատասխանեն իրականությանը:
– Դուք հավատացյա՞լ մարդ եք:
– Այո:
– Դա՞ էր պատճառը, որ կառավարության ծրագրի մեջ դրել էիք քրիստոնեության ամենամեծ բանալին՝ «Միասնություն` գլխավորում, ազատություն` երկրորդայինում և սեր` ամեն ինչում»: Որ դառնաք նախագահ, նախագահի ինստիտուտը, որ խաչ չի հանում, խաչ չի համբուրում, կփոխե՞ք:
– Ի՞նչ է նշանակում`«նախագահի ինստիտուտը խաչ չի հանում, խաչ չի համբուրում»: Որտեղի՞ց է ձեր մոտ այդ կարծիքը. հանրապետության նախագահը մասնակցում է մեր եկեղեցական բոլոր տոներին, և հետո դա այնքան անձնական խնդիր է, որ դրա մասին չարժե բարձրաձայն խոսել:
–Լավ, վերջին հարցը. Դուք բանասեր եք. մենք այնքան քիչ ենք տեսնում Ձեզ այդ կարգավիճակում. հիմա` ե՞ք, թե` չեք:
-Եմ:
Կարմեն Դավթյան
2007 թ.