Տարիներ առաջ հնարավորություն ենք ունեցել պայմանավորվածությունների հասնելու, որը կօգներ փրկել հազարավոր կյանքեր և՛ Ադրբեջանի, և՛ Հայաստանի կողմից. Լավրով
Ռուսաստանը երկար տարիներ, եթե ոչ տասնամյակներ առավելագույն ուշադրություն է դարձրել Լեռնային Ղարաբաղի հակամարտությանը: Այս մասին հայտնել է ՌԴ ԱԳ նախարար Սերգեյ Լավրովն Իրանի ԱԳ նախարար Մոհամմադ Ջավադ Զարիֆի հետ համատեղ ասուլիսում:
«ԵԱՀԿ Մինսկի խմբի եռյակից, որում ընդգրկված են նաև Ֆրանսիան և ԱՄՆ-ն, եթե օբյեկտիվորեն նայենք, մենք առավելագույն հետևողականությամբ առաջ ենք քաշել տարատեսակ գաղափարներ: Մենք մի քանի տարի առաջ հնարավորություն ենք ունեցել պայմանավորվածությունների հասնելու ռուսական առաջարկների հիման վրա, որոնք հավանության են արժանացել մյուս համանախագահների կողմից, ինչը կօգներ փրկել հարյուրավոր և հազարավոր կյանքեր և՛ Ադրբեջանի, և՛ Հայաստանի կողմից: Ցավոք սրտի դա այն ժամանակ տեղի չունեցավ»,- նշել է Լավրովը:
Վերջինս հավելել է, որ ներկա պահին ստեղծված իրավիճակը, որին հաջողվել է հասնել ՌԴ նախագահի՝ Ադրբեջանի նախագահի և Հայաստանի վարչապետի հետ բազմաթիվ բանակցությունների արդյունքում, ձեռք է բերվել հազարավոր կյանքերի գնով:
«Մենք չենք պատրաստվում դադարեցնել մեր ուշադրությունը Լեռնային Ղարաբաղում տիրող իրավիճակի հանդեպ: Այդ մասին վկայում է հունվարի 11-ին Մոսկվայում կայացած հանդիպումը Ռուսաստանի, Ադրբեջանի և Հայաստանի ղեկավարների միջև, որի արդյունքում պայմանավորվածություն է ձեռք բերվել տարածաշրջանում տնտեսական, տրանսպորտային կապերի բացման մեխանիզմներ մշակելու մասին»,- հավելել է Լավրովը:
