Պայմանական եղանակի ծուղակը․ պետության ղեկավարը հենց նրա համար է, որ նրա գլխին ոչ մի բան չկոտրեն. «Առավոտ»
«Առավոտ» թերթը գրում է. ««Եթե նախկինները չթալանեին, ապա մենք այս պատերազմում կհաղթեինք»՝ ամբոխին հրամցվող այս թեզը մտավարժանքների ժանրից է: Համոզված եմ, որ կոռուպցիայի մակարդակը Հայաստանում բարձր էր [բայց ոչ ավելի բարձր, քան Ադրբեջանում և Թուրքիայում]: Այնուամենայնիվ, «նախկինների թալան» բառակապակցությունը, թեև էմոցիոնալ առումով ընդունելի է [նաև ինձ համար], բայց որևէ իրավական և, առավել ևս՝ պատմական բովանդակություն չունի:
«Նրանք թալանեցին և ամեն ինչ կոտրեցին խեղճ Նիկոլի գլխին»․ այդ թեզը նույնքան անմեղսունակ է հնչում: Պետության ղեկավարը հենց նրա համար է, որ նրա գլխին ոչ մի բան չկոտրեն, եթե կասկածեր ունես, որ գլխիդ ինչ-որ բան է կոտրվելու, կռիվ մի տուր «թագավորի գահին» բազմելու համար: «Նախկինները ձև էին անում, թե բանակցում են, բայց իրականում չէին պատրաստվում Արցախի խնդիրը լուծել»․ Ռոբերտ Քոչարյանի և Սերժ Սարգսյանի դեպքում դա միանգամայն ճիշտ դիտարկում է: Բայց ո՞վ ասաց, որ ձև անելն ու չլուծելը ավելի վատ է, քան պատերազմն ուղիղ հրահրող վարքագիծ դրսևորելը:
«Եթե հարուստներից իրենց դղյակները խլեինք, ապա քանի՞ հատ «Բայրաքթար» կգնեինք»․ շարիկովյան այդ հարցին կա պատասխան: «Բայրաքթար» 182 ստանդարտ կոմպլեկտը [6 դրոն, 3 ղեկավարման կայան և այլ օժանդակ սարքավորումներ] արժե մոտավորապես 70 միլիոն դոլար: Մեկ դղյակի արժեքը, ենթադրենք, 1 միլիոն դոլար է: Հետևաբար, այդ մեկ կոմպլեկտը գնելու համար հարուստներից պետք էր խլել 70 դղյակ: Դա կապահովե՞ր մեր հաղթանակը:
Բայց «խլելը» կունենար նաև այլև հետևանքներ: Եթե դատարանով ապացուցված չէ, որ դղյակը կառուցվել է Հայաստանի պետական բյուջեի գումարներով, ապա ապօրինաբար «խլելը» խիստ բացասաբար կազդեր տնտեսության վրա: Շարիկովյան երկրում ոչ ոք ներդրում չի անում»:
Նյութն ամբողջությամբ կարդացեք թերթի այսօրվա համարում:
