Պակիստանի, Թուրքիայի և Ադրբեջանի եռակողմ բանակցությունները փաստացի թիրախավորել են Հայաստանը, Հնդկաստանը և Կիպրոսը․ Աշոտյան
Այսօր Իսլամաբադում տեղի է ունեցել Պակիստանի, Թուրքիայի և Ադրբեջանի ԱԳ նախարարների եռակողմ բանակցությունները, որոնց արդյունքում ընդունված հռչակագիրը վերաբերում է նաև Արցախին։ Այս մասին ֆեյսբուքյան իր էջում գրում է Արմեն Աշոտյանը։
«Երեք կողմերը միմյանց փոխադարձ աջակցությունն են վերահաստատել Արցախի, ինչպես նաև Քաշմիրի և Արեւելյան Միջերկրականի հարցերում։
Փաստացի թիրախավորվել են Հայաստանը, Հնդկաստանը և Կիպրոսը։
Հռչակագիրը խրախուսելու է նաև փոխադարձ տնտեսական ներդրումները։
Տվյալ հռչակագրով հայտարարված նման բացահայտ դիրքորոշումները վկայում են ոչ միայն պանթուրքիզմի և նեոօսմանիզմի, այլև պանիսլամիզմի պրոյեկտների զարգացման նոր վտանգավոր մակարդակների մասին։
Վերջին պատերազմում մեր դեմ կողք կողքի մասնակցած այդ պետությունները փաստացի ստացել են իրենց ռազմական ավարը և հավակնում են առավել ընդարձակ ազդեցության, այդ թվում՝ Հայաստանի և Արցախի դեմ։
Աշխարհը մեզ համար նոր, դաժան փորձություններ է պատրաստում։
Իսկ մենք դեռ դավաճան ստահակին դուրս չենք նետել իր աշխատասենյակից, որ փորձենք փրկել Հայաստանը»,- գրում է Աշոտյանը։