Ձեր բռնած ճամփան ճամփա չէ․ Թուրքիայի նախկին փոխվարչապետը՝ Էրդողանին
Թուրքիայի նախկին արտգործնախարար ու փոխվարչապետ Ալի Բաբաջանն անդրադարձել է նախագահ Ռեջեփ Էրդողանի նոր տնտեսական քաղաքականությանն ու տարադրամի տատանումները զսպելու քայլերին: Այս մասին գրում է ermenihaber.am-ը։
Ըստ Բաբաջանի՝ Էրդողանն ու իր գործընկերները հասկանում են, որ իրենք ճանապարհի վերջում են ու գործում են «մեզնից հետո թեկուզ ջրհեղեղ» սկզբունքով:
«Պարոն Էրդողանին եմ դիմում՝ նրան զգուշացնելը պարտականություն համարելով: Ձեր բռնած այս ճամփան ճամփա չէ»,- ասել է Բաբաջանը:
Վերջինս անդրադառնալով թուրքական արժույթով ավանդներ ունեցողներին տարադրամի փոխարժեքի տարբերությունը վճարելու մասին Էրդողանի խոստումներին՝ հարց է հղել, թե բյուջեից վճարվելիք այդ գումարներով քանի գործազուրկի կարելի էր գործի տեր դարձնել:
Ըստ ընդդիմադիր գործչի՝ այս քայլով լիրայով ավանդները կապվել են դոլարի հետ, այնինչ իշխանությունները հաճախակի ասում են, որ պետք չէ դոլարի կողմը նայել (ուշադրություն դարձնել դոլարի փոխարժեքին):
Բաբաջանը նաև քննադատել է Թուրքիայի նախագահի՝ կենտրոնական բանկի վերաֆինանսավորման տոկոսադրույքը նվազեցնելու քաղաքականության համար կրոնական դոգմաները որպես հիմնավորում ներկայացնելը:
«Մենք մեր կրոնի սրբություններն առoրյա քաղաքականության նյութ չենք դարձնելու: Էրդողանը մեր կրոնի սրբություններն ամեն օր քաղաքականության նյութ է դարձնում: Երկիրը խորտակվում է, սրանք մեր ժողովրդի մաքրամաքուր կրոնն ու ազգային զգացմունքները շահարկման առարկա են դարձնում»,- ասել Բաբաջանը:
