Ցավալիորեն, վերջին ռազմական գործողությունները հերթական քննությունն էին. Աբրահամյան (տեսանյութ)

«Նոր իրողությունները ստիպում են Հայաստանի և Արցախի Հանրապետություններին կտրուկ վերանայումներ իրականացնել առաջնագծում, որն առ այս պահը չի իրականացվել»,- լրագրողների հետ ճեպազրույցում ասաց ԱԺ «Պատիվ ունեմ» խմբակցության պատգամավոր Տիգրան Աբրահամյանը:

Նրա կարծիքով, իշխանությունը, նաև որոշ շրջանակներ նպատակային ձևով փորձում են առաջնագծում անհրաժեշտ ենթակառուցվածքների ստեղծումը, տեխնիկական կահավորումը ներկայացնել շատ կենցաղային մակարդակում, օրինակ՝ վրանները բուտկաներով  փոխարինելու տեսանկյունից, կամ՝ եթե բետոնե պատնեշներ կան, նշանակում է, որ կա ամուր դիրք և այլն:

«Սահմանային ենթակառուցվածքը բավականին բազմաշերտ է: Ենթադրում է  ճանապարհներ, դիրքերի միջև անվտանգ կապ մեքենաների և զինծառայողների տեղաշարժի համար: Ենթադրում է  ցանկացած պայմաններում՝ պաշտպանական, հակահարձակողական, հարձակողական գործողություններ վարելու հնարավորություն: Ստեղծված իրավիճակում Հայաստանի իշխանությունն այդ խնդիրները որևէ ձևով չի լուծում»,- ասաց Տ. Աբրահամյանը:

Նա նշեց, եթե ունենային 100 տոկոսանոց ապահովածություն, ապա 1-2 օրվա ռազմական գործողությունների դեպքում հայկական կողմը չէր ունենա 6 զոհ, 32 գերի, վիրավորներ, հենակետերի կորուստներ:
«Ցավալիորեն, այս իրավիճակը հերթական քննությունն էր. արձանագրվեց, որ այն խնդիրներ, որոնք այս ընթացքում բարձրաձայնվել են և այն հավաստիացումները, որոնք տրվել են իշխանության կողմից, որևէ աղերս չունեին իրականության հետ»,- ասաց Տիգրան Աբրահամյանը:

Մանրամասները՝ տեսանյութում