Չինաստանում արձագանքել են Օլիմպիական խաղերում ԱՄՆ դիվանագետների բոյկոտին
Վաշինգտոնում Չինաստանի դեսպանատունը 2022 թվականին Պեկինում կայանալիք Օլիմպիական խաղերը բոյկոտելու ԱՄՆ-ի կողմից հնչեցված որոշումը քաղաքական շահարկում է համարել։ Ըստ լրատվամիջոցների՝ դիվանագիտական առաքելությունը նաև նշել է, որ նման գործողությունները խեղաթյուրում են օլիմպիական ոգին։ Գրում է tvzvezda.ru-ն:
Մասնավորապես, ըստ մամուլի, Չինաստանի արտաքին գործերի նախարարության ներկայացուցիչ Չժաո Լիցզյանը նշել է, որ ՉԺՀ-ն վճռական հակաքայլեր կձեռնարկի, եթե Միացյալ Նահանգները շարունակի այդ կուրսը։ Բացի այդ, ինչպես հայտնում է Reuters-ը, Չինաստանը պահանջել է զերծ մնալ բոյկոտի կոչերից, «որպեսզի չազդի Չինաստանի ու ԱՄՆ-ի միջև կարևոր ոլորտներում երկխոսության և համագործակցության վրա»։
Միջազգային օլիմպիական կոմիտեն իր հերթին հարգանքով է վերաբերվում Միացյալ Նահանգների դիրքորոշմանը։ Միջազգային օլիմպիական կոմիտեն պետության ներկայացուցիչների ներկայության հարցը համարել է զուտ քաղաքական և հայտարարել իր չեզոքության մասին։
Ավելի վաղ Սպիտակ տան մամուլի քարտուղար Ջեն Փսակին հայտարարել էր, որ ԱՄՆ իշխանությունների ներկայացուցիչները Ձմեռային օլիմպիական խաղերի ժամանակ մտադիր չեն այցելել Չինաստան։ Հստակեցվել է, սակայն, որ խաղերը բոյկոտելը կտարածվի միայն ԱՄՆ պետական պաշտոնյաների վրա և չի վերաբերի մարզիկներին։
