«Ի սեր Աստծո, էլ մի՛ խոսիր». Դավութօղլուն Էրդողանին

Թուրքիայի նախկին վարչապետ, ընդդիմադիր «Ապագա» կուսակցության հիմնադիր Ահմեթ Դավութօղլուն սոցցանցում կատարած գրառմամբ նախագահ Էրդողանին խնդրել է այլևս չխոսել լիրայի կուրսի վերաբերյալ, քանի որ դրանից հետո ավելի է արժեզրկվում թուրքական արժույթը: Այս մասին գրում է Ermenihaber.am-ը:

Բանն այն է, որ Էրդողանը նոյեմբերի 30-ին թուրքական «TRT»-ի կազմակերպած եթերի ժամանակ մեկնաբանելով ազգային արժույթի շարունակական արժեզրկումը, կրկին ասել էր, որ իր կառավարությունը վարում է տոկոսների նվազեցման քաղաքականություն: Ըստ Թուրքիայի նախագահի՝ իրենք տնտեսության նոր մոդել են որդեգրել, որի շրջանակներում նվազեցնում են վերաֆինանսավորման տոկոսադրույքը՝ դրանով խթանելով աջակցելով տեղական արտադրողին ու խթանելով արտահանումը:

Էրդողանի այս մեկնաբանություններից հետո թուրքական լիրայի փոխարժեքը 1 դոլարի նկատմամբ 13.30-ից հասել է 13.96-ի՝ գրանցելով հերթական պատմական հակառեկորդը:

Այս զարգացումներից հետո Դավութօղլուն սոցիալական ցանցում հետևյալ գրառումն է արել. «Այն պահին, երբ պետք է երկրին վստահություն ներշնչել, հանգստացնել քաղաքացիներին, նախագահի եթերի ժամանակ դոլարի փոխարժեքը հատում է 13 լիրան, եթերից հետո հասնում մինչև 14-ի: Այսպիսի հայտարարությունները լիրայի վրա դիտավորյալ հարձակման բնույթ են ստացել: Ի սեր Աստծո, էլ մի՛ խոսիր»:

Նշենք, որ թուրքական լիրայի արժեզրկման ու ընդհանուր դժգոհությունների ֆոնին հրաժարական է տվել այդ երկրի գանձապետարանի և ֆինանսների նախարար Լութֆի Էլվանը: