Զանգեզուրի տրանսպորտային միջանցքը դառնում է իրականություն․ Ալիև
Ադրբեջանի նախագահ Իլհամ Ալիևը համարում է, որ «Զանգեզուրի տրանսպորտային միջանցքը դառնում է իրականություն»:
«Այդ նոր տրանսպորտային ենթակառուցվածքը կդառնա Արևելք-Արևմուտք և Հյուսիս-Հարավ միջանցքի կարևոր մասը»,-հայտարարել է Ալիեւը՝ Աշխաբադում Տնտեսական համագործակցության կազմակերպության (ՏՀԿ) անդամ երկրների առաջնորդների 15-րդ գագաթնաժողովի ժամանակ ելույթ ունենալիս: Ընդ որում՝ նա համոզմունք է հայտնել որ «ՏՀԿ երկրները կօգտվեն Զանգեզուրի միջանցքի հնարավորություններից»:
Նրա խոսքով՝ երկրի իշխանություններն անցկացնում են լայնամասշտաբ աշխատանքներ Ղարաբաղի «օկուպացված» ու այսպես կոչված «Արևելյան Զանգեզուրի» տարածքները վերականգնելու ուղղությամբ: «2021 թվականին այդ նպատակով պետբյուջեից հատկացվել է 1,3 միլիարդ դոլար, 2022 թվականին կհատկացվեն առնվազն նույնքան միջոցներ»,-նշել է նա՝ հավելելով, որ Ղարաբաղն ու «Արևելյան Զանգեզուրը» հայտարարվել են «կանաչ էներգիայի» գոտիներ. այդ տարածքներում արեւային էներգիայի պոտենցիալը գնահատվում է 7200 մեգավատ, քամու էներգիան՝ 2000 մեգավատ:
