2020 թ. դեկտեմբերին հայկական ԶՈՒ-ի դուրսբերումը հանգեցրել է «Զանգեզուրի միջանցքի» լեգիտիմացմանը. Արթուր Ղազինյան

«Նիկոլ Փաշինյանը խորհրդարանում ինքնախոստովանական ցուցմունք տվեց, որ հանցանք է կատարել  հայկական պետականության դեմ, ինքնիշխանության դեմ գործողություն է կատարել»,- «Հայաստան» դաշինքի կազմակերպած  «Պատերազմի քննիչ հանձնաժողովի անհրաժեշտությունը. հետպատերազմյան ապաքինում» թեմայով քննարկմանն ասաց  «Հայաստան» խմբակցության պատգամավոր Արթուր Ղազինյանը։

Նա նշեց, որ Սյունիքում հայկական զորքերի նահանջի վերաբերյալ դեռ 2020 թ. դեկտեմբերին էին հաղորդում ներկայացրել հանցագործության մասին։

«Նշվել են բոլոր հանգամանքները՝ պետական սահմանի մասին ՀՀ օրենքի կարգավորումները, դրանց ակնհայտ  խախտումները։ Նշված են եղել՝  առկա է եղել գրավոր կամ բանավոր փոխըմբռնում Ադրբեջանի հետ, այլապես հնարավոր չէ որևէ կերպ բացատրել, թե ինչ դրդապատճառ է եղել, որ իրավական ակտով է առաջնորդվել երկրի ղեկավարի պաշտոնը զբաղեցնող անձը հայկական զինված ուժերի նահանջի հրաման արձակելիս։

Փաշինյանը նաև ինքնախոստովանական ցուցմունք տվեց, որ ինքն է այդ հրամանը տվել»,- ասաց ընդդիմադիր պատգամավորը։

Նա ընդգծեց՝ Հայաստանում իրավակարգի գոյության պարագայում այս մարդիկ պետք է գտնվեին մեկուսարանում դեռ շատ վաղուց՝ պետական դավաճանության, լիազորությունների վերազանցման, տարածքային ամբողջականության դեմ ուղղված գործողությունների հոդվածներով։

«Պետական ծառայության և պետական կարգի դեմ հանցագործությունների բաժինների գրեթե բոլոր հոդվածներով իրենց կարելի է  մեղադրանք առաջադրել, եթե իրավակարգը վերականգնվի»,- ասաց Ա. Ղազինյանը։

Նա ընդգծեց, որ  2020 թ. դեկտեմբերի կեսերին հայկական զինված ուժերի դուրսբերումն ուղղակիորեն հանգեցրել է «Զանգեզուրի միջանցքի»  լեգիտիմացմանը։

«Ես երաշխավորում եմ՝ եթե մենք զորքերը հետքաշելու հրաման չտայինք, այսօր Թուրքիան և Ադրբեջանը չէին կարողանալու պրակտիկ կիրառման տեսակետից լեգիտիմացնել այսպես կոչված «Զանգեզուրի միջանցքը», որովհետև այն ժամանակ միջանցքի երկարությունը կազմում էր մոտ 40 կմ, հիմա՝ 20 կմ»,- ասաց Արթուր Ղազինյանը։