Սահակաշվիլին բանտում կմնա առնվազն 6 տարի. Վրաստանի վարչապետ

Վրաստանի վարչապետ Իրակլի Ղարիբաշվիլին հայտարարել է, որ երկրի նախկին նախագահ Միխեիլ Սահակաշվիլիի վաղաժամկետ ազատումը բանտից անհնար է՝ հավելելով, որ նա կազատազրկվի առնվազն վեց տարով։ Այս մասին գրում է «Ռոսիա թդեյ»-ը։

«Միտումնավոր կերպով տեղեկատվություն է տարածվում, որ իբր նա վեց տարի չի լինի անազատության մեջ, նրան կհանձնեն Ուկրաինային և այլն: Այս ամենը բացառվում է: Բացառվում է, որ Սահակաշվիլին բանտից դուրս գա ժամկետից շուտ: Նա բանտում կմնա առնվազն վեց տարի»,- ասել է Ղարիբաշվիլին:

Սահակաշվիլին ձերբակալվել է Վրաստանում հոկտեմբերի 1-ին: Միաժամանակ, Վրաստանի օմբուդսմեն Նինո Լոմջարիան հայտարարել էր, որ ձերբակալությունից հետո նա հացադուլ էր սկսել, քանի որ համաձայն չէ առաջադրված մեղադրանքների հետ և իրեն համարում է քաղբանտարկյալ: Վրաստանում Սահակաշվիլին ներգրավված է մի քանի քրեական գործերում: Նախկին նախագահը հեռակա դատապարտվել է բանկիր Սանդրո Գիրգվլիանիի սպանության և պատգամավոր Վալերի Գելաշվիլու ծեծի հպատճառով: Առաջին դեպքում նա դատապարտվել է երեք տարվա ազատազրկման, երկրորդում՝ վեցի: Բացի այդ, Սահակաշվիլին ներգրավված է 2007 թվականի նոյեմբերի 7-ին ընդդիմության հանրահավաքը ցրելու, «Իմեդի» հեռուստաընկերության ջարդի և պետական բյուջեից միջոցների յուրացման գործերում: