Քննարկվում է «3 + 3» ձևաչափի ստեղծումը՝ Հայաստանի, Ադրբեջանի, Վրաստանի, Իրանի, Ռուսաստանի և Թուրքիայի մասնակցությամբ. Սերգեյ Լավրով
ՌԴ ԱԳ նախարար Սերգեյ Լավրովը հայտնել է, որ Մոսկվայում Իրանցի պաշտոնակից Հոսեյն Ամիր-Աբդոլլահիանի հետ բանակցությունների ժամանակ քննարկվել է Թուրքիայի, Ադրբեջանի, Հայաստանի և Վրաստանի հետ 3+3 ձևաչափի ստեղծման գաղափարը: Այս մասին հաղորդում է ՏԱՍՍ https://tass.ru/politika/12591919 գործակալությունը:
Պատասխանելով լրագրողների հարցերին՝ Լավրովն ընդգծել է, որ հենց Ռուսաստանն է նպաստել մեկ տարի առաջ պատերազմի դադարեցմանն ու Ադրբեջանի նախագահի և ՀՀ վարչապետի միջև համաձայնագրի կնքմանը, որի արդյունքում ռուս խաղաղապահներ են տեղակայվել Լեռնային Ղարաբաղում:
«Այդ նույն համատեղ հայտարարությունը սկզբունքներ է պարունակում, որոնցով որոշվում են կարգավորման ուղղությամբ հետագա քայլերը, այդ թվում՝ տարածաշրջանում բոլոր տրանսպորտային հաղորդակցությունների ապաշրջափակմանն ուղղված աշխատանքները, որից կշահեն ոչ միայն Հայաստանն ու Ադրբեջանը, այլև Վրաստանը, Իրանը, Ռուսաստանը և Թուրքիան: Այդ համատեքստում այսօր քննարկել ենք «3+3» ձևաչափի ստեղծման նախաձեռնությունը, որը կներառի երեք կովկասյան երկրները և 3 խոշոր հարևան երկրները՝ Ռուսաստանը, Թուրքիան և Իրանը»,- ասել է Լավրովը:
Նա շեշտել է, որ իրանական կողմը դրական է գնահատում այդ նախաձեռնությունը: «Դրական են արձագանքել նաև Ադրբեջանում, Թուրքիայում, աշխատում ենք մեր հայ գործընկերների հետ: Հուսով ենք, որ Վրաստանը ևս հետաքրքրություն կտեսնի նման ձևաչափին միանալու համար»,- հավելել է ՌԴ ԱԳ նախարարը:
