Բաքուն ամեն կերպ փորձում է իր իսկ կատարած հանցագործությունները բարդել հայերի վրա
Ադրբեջանի գլխավոր դատախազ Քյամրան Ալիևը նշել է, որ պատերազմական հանցագործությունների կապակցությամբ հարուցվել է 76 քրեական գործ, որոնցից «39-ը վերաբերում են խաղաղ բնակչության դեմ կատարված հանցագործություններին». այսպիսով Ադրբեջանն ամեն կերպ փորձում է իր իսկ զինվորականության ու քաղաքացիների կողմից կատարված անմարդկային հանցագործությունները բարդել հայերի վրա:
Ադրբեջանական ԶԼՄ-ները հայտնում են, որ Քյամրան Ալիևը հայտնել է «24 հայերի հանդեպ հայտարարված միջազգային հետախուզման մասին»:
Ադրբեջանի գլխավոր դատախազը տեղեկացրել է, որ հետախուզում է հայտարարված նաև 300 անձի նկատմամբ, որոնք «հանցագործություններ են կատարել ադրբեջանցի զինծառայողների դեմ ղարաբաղյան առաջին պատերազմի և հրադադարի ռեժիմի ժամանակ»։
Քյամրան Ալիևը նաև ձեռնամուխ է եղել ԼՂ-ում աշխատող «ընկերություններին պատասխանատվության ենթարկելուն»:
«Ձեռնարկվում են օպերատիվ-հետախուզական միջոցառումներ՝ Ադրբեջանի ազատագրված տարածքներում անօրինական բիզնեսով զբաղվող օտարերկրյա ընկերություններին պատասխանատվության ենթարկելու համար»,-ասել է Ալիևը:
Լրատվամիջոցները գրել են, թե դատախազությունն «աշխատում է բնակավայրերին, պատմական, կրոնական և մշակութային հուշարձաններին, այլ գույքին հայկական վանդալիզմի հասցված վնասի գնահատման և միջազգային դատարաններ դիմելու ուղղությամբ»։