Սասուն Խաչատրյանը նշանակվեց հակակոռուպցիոն կոմիտեի նախագահ
Կառավարությունն իր այսօրվա՝ սեպտեմբերի 16-ի նիստում որոշում կայացրեց ՀՔԾ պետ Սասուն Խաչատրյանին նշանակել հակակոռուպցիոն կոմիտեի նախագահ:
Հարցը ներկայացրեց վարչապետի աշխատակազմի նախագահ Արայիկ Հարությունյանը՝ նշելով, որ սա կարևոր քայլ է հակակոռուպցիոն քաղաքականության իրականացման ճանապարհին: Նա հիշեցրեց, որ մրցույթին հայտ էին ներկայացրել 3 դիմորդներ՝ Սասուն Խաչատրյանը, Գառնիկ Թորոսյանը և Դավիթ Մկրտումյանը: Սեպտեմբերի 10-ին տեղի է ունեցել մրցույթը, որտեղ առավելագույն միավորումներ է հավաքել Սասուն Խաչատրյանը:
Իր հերթին Սասուն Խաչատրյանը նշեց, որ կառույցը լինելու է մասնագիտացված քննչական մարմին, որն ունենալու է նաև օպերատիվ-հետախուզական գործառույթներ: «Մասնագիտացումը բերելու է արդյունավետության բարձրացման: Կառույցն սկսելու է գործել առավելագույնը մեկ ամիս և 6 օր անց: Ամբողջությամբ այդ ընթացքում չի գործի, ընդամենը 20 քննիչ կնշանակվի, իսկ ամբողջ ծավալով կսկսի գործել եկող տարվա սկզբից: Եկող տարի նախատեսվում է նաև ստեղծել տարածքային մարմիններ»,-ասաց նա:
