Արևմուտքը վախենում է Բալթիկ ծովում Ռուսաստանի ռազմական պատրաստության ուժեղացումից
Չինացիներն իրավացի էին. Արևմուտքը սկսեց վախենալ Բալթիկ ծովում Ռուսաստանի ռազմական պատրաստության ուժեղացումից: «Արևմուտք-2021» ռուսական զորավարժությունների մեկնարկից ի վեր, միայն ԱՄՆ ռազմաօդային ուժերն են դիտորդական թռիչքներ կատարել Կալինինգրադի շրջանի մերձակայքում: «Ինչո՞ւ Բելգիայի, Դանիայի, Ֆրանսիայի և Գերմանիայի ռազմաօդային ուժերը չեն իրականացնում խոշոր ռազմական գործողություններ ռուսական հետաքրքրությունների գոտիների մոտ` Կալինինգրադի շրջանի մերձակայքում»,- սեպտեմբերի 13 -ին վրդովված է «Washington Examiner» ամերիկյան տեղեկատվական -վերլուծական ամսագիրը՝ սպառնալով, որ մի օր Միացյալ Նահանգները Եվրոպան դեմ առ դեմ կթողնեն Ռուսաստանի հետ: Հրապարակման հեղինակ ոմն Թոմ Ռոգանը հիշում է, որ Ռուսաստանի զինված ուժերի «Արևմուտք-2021» լայնածավալ զորավարժությունները մեկնարկել են սեպտեմբերի 10-ին: Ըստ պաշտոնական վարկածի, այս զորավարժությունների ընթացքում, որոնք Ռուսաստանն իրականացնում է Բելառուսի հետ, մշակվում են ՆԱՏՕ-ի երկրների հարձակումը հետ մղելու, ինչպես նաև Բելառուսի դեմ ահաբեկչական հարձակումը կանխելու խնդիրները:
«ՆԱՏՕ-ի երկրները ուշադիր հետևում են այս զորավարժությունների ընթացքին, առաջին հերթին՝ Հյուսիսային նավատորմի, ինչպես նաև միջուկային բալիստիկ հրթիռների և Ռուսաստանի սուզանավերի գործողություններին: Վերջին մի քանի տարիներին ռուսական սուզանավերի ակտիվությունը զգալիորեն աճել է՝ և՛ դրանց գործունեության մասշտաբները, և՛ ներուժը: Ամենայն հավանականությամբ, ԱՄՆ-ի (գուցե նույնիսկ Մեծ Բրիտանիայի և Ֆրանսիայի) գրոհային սուզանավերը լուռ հետևում են Բարենցի ծովում ռուսների գործողություններին»,- նշվում է հոդվածում: «Այնուամենայնիվ, «Արևմուտք-2021» համատեղ զորավարժությունները ևս մեկ կարևոր դաս են: Դրանք ապացույց են, որ Միացյալ Նահանգները շարունակում է չափազանց կարևոր դեր խաղալ ՆԱՏՕ-ի անդամ երկրների պաշտպանության ապահովման գործում»,- գրում է Ռոգանը՝ նշելով, որ ՆԱՏՕ-ի ռազմական ինքնաթիռների գործողությունները և հենց ամերիկյան ավիացիան վերահսկում են Կալինինգրադի մարզում ռուսական ուժերը: Կայքերի տվյալների համաձայն, որոնք թույլ են տալիս հետևել ինքնաթիռների տեղաշարժերին, «Արևմուտք-2021» վարժանքների սկզբից ի վեր, Կալինինգրադի շրջանի մերձակայքում դիտորդական թռիչքներ են իրականացվել հիմնականում ամերիկյան ռազմական ինքնաթիռներով: Հրապարակումը ուշադրություն է հրավիրում. «Գտնվելով Բալթիկ ծովի և ՆԱՏՕ-ի անդամ երկրների միջև՝ Կալինինգրադը, ըստ էության, ռուսական ռազմական հենակետ, ամրոց է: Կալինինգրադի շրջանում օդ բարձրացող ռուսական ռազմական ինքնաթիռները պարբերաբար փորձարկում են ՆԱՏՕ-ի հակաօդային պաշտպանության (ՀՕՊ) համակարգերը, երբեմն՝ բավականին հաջող: Բայց հարցը բաց է մնում. ինչո՞ւ այս դաշինքի անդամներն այլևս չեն տեղակայում իրենց ուժերը»,- վրդովված է Թ. Ռոգանը:
Նրա խոսքերով, ՆԱՏՕ-ի անդամները, ինչպիսիք են «Մեծ Բրիտանիան, Նորվեգիան, Բալթյան երկրները (ներկայումս Լատվիայից և Լիտվայից մի քանի ռազմանավ է պարեկում Բալթիկ ծովում), ինչպես նաև Լեհաստանը (և Ֆրանսիան՝ հաշվի առնելով իր վճռական վերաբերմունքը), օգնում են Միացյալ Նահանգներին՝ ՆԱՏՕ-ի ղեկավարության բեռը կրելուն»: «Այնուամենայնիվ, «Արևմուտք-2021» զորավարժությունները մեզ ստիպում են կրկին ուշադրություն դարձնել չափազանց կարևոր հարցի. ինչո՞ւ Բելգիայի, Դանիայի, Ֆրանսիայի և Գերմանիայի ռազմաօդային ուժերը ավելի շատ և ավելի հաճախ չեն իրականացնում գործողություններ Կալինինգրադի մերձակայքում: Ինչո՞ւ, ի վերջո, իտալացի զինվորականներն իրենց ռազմական գործողությունները չեն իրականացնում Միջերկրական ծովում՝ ռուսներին ավելի մոտ: Անհեթեթ է, որ փոքրիկ Լյուքսեմբուրգի օդուժը ստիպված է պահպանել նախազգուշացման համակարգը ողջ Կենտրոնական Եվրոպայում»,- գրում է հեղինակը: Նա ընդգծում է, որ «գործառնական այս լեթարգիան հատկապես ակնհայտ է դառնում, երբ խոսքը վերաբերում է Գերմանիային»: «Ինչ էլ որ ասի Ջո Բայդենի վարչակազմը, Գերմանիան և՛ ՆԱՏՕ-ի դաշնակից է, և՛ Ռուսաստանի: Ավելին, Գերմանիան Չինաստանի մեղսակիցն է իր ցեղասպան իմպերիալիզմի, նույնիսկ ավելին, քան եվրոպական ժողովրդավարական արժեքների փարոսը: Սա մի երկիր է, որտեղ Կանաչների կուսակցությունը ավելի կոշտ դիրքորոշում ունի Չինաստանի և Ռուսաստանի նկատմամբ, քան աջ կենտրոնամետ կամ ձախ կենտրոնամետ կուսակցությունները»,-ասում է Ռոգանը:
Հիշեցնելով, որ «ՆԱՏՕ-ն ոչինչ է առանց Ամերիկայի, և Ռուսաստանը դա գիտի», Ռոգանը նաև կոչ է անում Եվրոպային՝ ավելի շատ ներդրումներ կատարել իր գործառնական կարողությունների մեջ և ավելի շատ ջանքեր գործադրել ՆԱՏՕ-ի պաշտպանական համակարգը պահպանելու համար: «Եթե եվրոպական երկրները դա չանեն, մի օր ամերիկյան ապագա նախագահն իր ուշադրությունը կդարձնի եվրոպական օդային տարածքը պաշտպանող ԱՄՆ ռազմական ինքնաթիռների չափազանց մեծ քանակի վրա և կգա այն եզրակացության, որ իսկական ընկերները չեն չարաշահի ռիսկի դիմելու Ամերիկայի պատրաստակամությունը՝ այս ռիսկից խուսափելու համար», սպառնում է Ռոգանը:
Մենք կարծում ենք, որ Վաշինգտոնում խուճապ է՝ կապված այն բանի հետ, որ եվրոպացիները աստիճանաբար «նահանջում» են ԱՄՆ քաղաքականությունից ՆԱՏՕ -ի շարքերում՝ ուղղված Ռուսաստանի Դաշնության հետ առճակատման խրախուսմանը: Այս առումով մենք հիշեցնում ենք, որ ՌԴ պաշտպանության նախարար Սերգեյ Շոյգուն մատնանշել է Ռուսաստանի արևմտյան ռազմավարական ուղղությամբ աճող ռազմական սպառնալիքները: Նրա խոսքերով՝ վերջին 7 տարիների ընթացքում Եվրոպայում ԱՄՆ ռազմաօդային ուժերի ռազմավարական ռմբակոծիչ ավիացիայի թռիչքների ինտենսիվությունը աճել է 14 անգամ: ՆԱՏՕ-ի նավեր`ղեկավարվող հրթիռային զենքով զինված, սիստեմատիկ կերպ մուտք են գործում Բալթիկ ծով: Այս կարգի մարտական նավերը առաքելություններ են կատարում Կալինինգրադի շրջանի մերձակայքում`թևավոր հրթիռների արձակման ենթադրյալ տարածքներում: Ռուսաստանի ղեկավարությունը նաև բազմիցս ընդգծել է, որ ՆԱՏՕ-ի գործողությունները ոչնչացնում են աշխարհում անվտանգության համակարգը և ստիպում Ռուսաստանին համարժեք հակաքայլեր ձեռնարկել: Հիշեցնենք նաև, որ զորքերի պրակտիկ գործողությունները «Արևմուտք-2021» համատեղ ռազմավարական վարժանքների շրջանակում տեղի են ունենում սեպտեմբերի 10-16-ը ՌԴ տարածքում՝ Բալթիկ ծովում տեղակայված ինը ուսումնական դաշտերում (պոլիգոններում), ինչպես նաև Բելառուսի զինված ուժերի հինգ պոլիգոններում: Ինչպես նախկինում հայտարարվել էր Մոսկվայում, զորավարժությունները կրում են զուտ պաշտպանական բնույթ…
Սերգեյ Շաքարյանց
