Անհրաժեշտ է պատժամիջոցներ կիրառել Ալիևների ընտանիքի դեմ. փաստաբան
Փաստերը վկայում են գերեվարված հայերի դեմ իրականացված հանցագործություններին Ադրբեջանի ղեկավարության անմիջական մասնակցության մասին: Ադրբեջանական գերության մեջ գտնվող հայերի նկատմամբ խոշտանգումների և անմարդկային վերաբերմունքի վերաբերյալ Հայաստանի օմբուդսմենի զեկույցին նվիրված մամուլի ասուլիսին այս մասին հայտարարեց փաստաբան Սիրանուշ Սահակյանը:
Պատասխանելով Ադրբեջանի նկատմամբ միջազգային քրեական դատի հնարավորության մասին հարցին` փաստաբանը նշեց, որ կան սահմանափակումներ, բայց դրանք կարող են հաղթահարվել, եթե կան գործընկերներ: «Մասնավորապես՝ ՄԱԿ-ի Անվտանգության խորհրդի մասնակցությամբ: Այնուամենայնիվ, դրա համար անհրաժեշտ է ապահովել մի իրավիճակ, որում ոչ ոք վետո չի դնի: Այսինքն, մենք պետք է ապահովենք առնվազն Մեծ Բրիտանիայի ձայնը: Բոլորը գիտեն, թե ինչ կապերով է այս երկիրը կապված Ադրբեջանի հետ: Այսինքն՝ իրավական հնարավորություն կա, բայց ուժերի դասավորվածությունը հուշում է, որ մենք իրական հնարավորություններ չենք տեսնում»,- նկատեց փաստաբանը:
Նա ընդգծեց, որ թվարկված հանցագործություններն այնպիսին են, որ հետաքննություն են պահանջում համընդհանուր լիազորությունների շրջանակներում: Այսինքն, եթե պետությունը չի հետաքննում հանցագործությունը, մյուսներն են դա նրա համար անում: Առաջատար երկրներն ունեն այս փորձը: Այդ դեպքում պետության դատարանը, որի քաղաքացին տուժել է, քննում է գործը և որոշում է կայացնում: «Մենք պետք է ակտիվորեն աշխատենք՝ քրեական հետապնդում սկսելու և հանցագործություններին մասնակցած անձանց վերահսկողության տակ առնելու համար»,- ասաց նա:
Ալիևի անմիջական մասնակցության կապակցությամբ փաստաբանը հայտարարեց, որ նախագահ Ալիևը ռազմական հանցագործություն է կատարել, քանի որ հենց նա է հրաման տվել կեղծել և թաքցնել բանտարկյալների թիվը: Այս հիմքով անհրաժեշտ է պատժամիջոցներ կիրառել Ալիևների ընտանիքի դեմ:
