Պետք է ձևավորել համընդհանուր ազգային երազանք, գաղափար․Արթուր Վանեցյան (տեսանյութ)

«Մենք ապրում ենք մի տարածաշրջանում, որ եթե քեզ ապտակում են, դու չես պատասխանում, էլի են ապտակում, եթե փորձում են խլել քո ունեցվածքը, դու չես պաշտպանում, էլի են խլում»,- «Հայրենիք»-ի ճամբարականների հետ հանդիպման ժամանակ ասել է ԱԺ «Պատիվ ունեմ» խմբակցության ղեկավար, «Հայրենիք» կուսակցության նախագահ, ԱԱԾ  նախկին տնօրեն Արթուր Վանեցյանը:

Նրա խոսքով՝ մենք չենք կարող պատերազմի սպառնալիքից վախենալով ասել՝ դե լավ, թուրքերը թող գան ու մտնեն մեր երկիր:

«Թուրքը և ադրբեջանցին ապացուցում են, որ իրենց միակ նպատակը հայ ազգի բնաջնջումն է.  իրենք չեն ուզում մեզ հետ խաղաղ ապրել, իրենք ուզում են, որ մենք ուղղակի չլինենք, ֆիզիկապես ոչնչանանք»,- ասել է Արթուր Վանեցյանը՝

Հիշեցնելով, որ «թուրքական յաթաղանը 21-րդ դարում փոխարինվել է թուրքական բայրաքթարով»:

Արթուր Վանեցյանն անդրադառնալով, պատերազմի պատճառներին, նշել է, որ այս իշխանություններն իրենց անփորձության, ապաշնորհության պատճառով Հայաստանին բերեցին ու հասցրեցին պատերազմի:

«Հիմա շատ հարցեր են առաջանում՝ Նիկոլ Փաշինանը դա մտածվա՞ծ է արել, դավաճանական ծրագի՞ր է իրականացրել, թե  անհասկանալով, չգիտակցելով է արել:

Անկեղծ ասած, ինձ համար այդքան էլ մեծ չէ տարբերությունը, որովհետև գիտակցելով է դա արել, թե անգիտակից, ամեն դեպքում ունենք այն հետևանքը, որ ունենք՝ մեր հայրենիքի արցախյան հատվածի 75 տոկոսի կորուստ, հազարավոր զոհեր, վիրավորներ, այսօր մեր երկրում չլուծված անվտանգային խնդիրներ:

Սևանի ափին նստած  ենք, մի քանի կիլոմետեր այն կողմ ադրբեջանական զորքը մեր տարածքում է: Ցավոք սրտի, այս իշխանությունները չեն կարողանում դուրս շպրտել դրանց:
Սահմանը եկել ու հասել է հիմա այստեղ»,- ասել է Վանեցյանը:

Արթուր Վանեցյանը դիմելով երիտասարդներին՝ ասել է. «Մենք պետք է լավ ապրենք, վատ ապրելու իրավունք չունենք: Մարդ պետք է միշտ ձգտի լավ ապրելուն: Իշխանությունները փորձեցին մարդկանց համոզել, որ  հարուստ լինելը վատ է, եթե մարդ հարուստ է, ուրմեն հանցագործ է, բայց պետք չէ  մեղավորներ ման գալ: Պետք է աշխատել, աշխատել, աշխատել, դնել նպատակ ու գնալ առաջ: Եթե ունես նպատակ ու գնում ես առաջ՝  հաստատ նպատակդ իրագործելու ես:

Ես 16-17 տարեկանում նպատակ ունեի՝ դառնալ գեներալ, հիմա մեկ այլ նպատակ ունեմ, որին էլի հասնելու եմ, բայց բոլորով: Նպատակս մեկն է՝ ունենալ  ուժեղ, լավ Հայաստան,  քաղաքացիներ, որոնց խաբել անհնարին է:

Պետք է լավ սովորեք: Լավ սովորելն ամենակարևորն գործն է, որ պետք է անեք: Այսօր դուք այլ գործ չունեք, բայց մի մոռացեք նաև բակում խաղալ, ընկերություն անել, շփվել, սիրահարվել:

Ամենակարևորը խորհուրդս է՝ բարի լինել, եթե դիմացինը ստոր է, սրիկա է, խաբում է, մի չարացեք: Միշտ պետք է երազանք ունենալ:

Եթե կարողանանք ձևավորել համընդհանուր ազգային  երազանք, գաղափար, այդ գաղափարի շուրջ միշտ հավաքվելու ենք: Մեր խնդիրն է գտնել այդ գաղափարը, երազանքը, ինչի շուրջ համախմբենք:

Մենք պարտավոր ենք ապրել ու ապրեցնել մեզ հետ ողջ հայ ազգին, որովհետև դուք եք այն երիտասարդները, այն մարդիկ, որոնք մեր երկիրը ծաղկեցնելու և շենացնելու են»: