ՀՀ ժողովրդական արտիստ, կոմպոզիտոր Վլադիլեն Բալյանի հոգեհանգիստը կկայանա օգոստոսի 30-ին
Հայաստանի կոմպոզիտորների միության անդամ, ՀՀ ժողովրդական արտիստ, Երևանի պատվավոր քաղաքացի, կոմպոզիտոր Վլադիլեն Բալյանի հոգեհանգիստը տեղի կունենա օգոստոսի 30-ին ժամը 18։00-20։00-ն՝ Ֆիլհարմոնիկ մեծ համերգասրահում։ Հուղարկավորությունը տեղի կունենա օգոստոսի 31-ին․ ժամը 12։00-14։00 -ին ֆիլհարմոնիկ մեծ համերգասրահում քաղաքացիները վերջին հրաժեշտը կտան սիրված երգահանին, ինչից հետո Թոխմախի գերեզմանատան պանթեոնում տեղի կունենա հուղարկավորությունը։
Հիշեցնենք, որ երեկ կյանքի 97-րդ տարում վախճանվել է հայազգի կոմպոզիտոր, ՀՀ ժողովրդական արտիստ Վլադիլեն Բալյանը։
Վլադիլեն Բալյանը ծնվել է 1924 թվականի ապրիլի 25-ին, Երևանում։ Սովորել է Ռոմանոս Մելիքյանի անվան երաժշտական ուսումնարանում, այնուհետև՝ Երևանի Կոմիտասի անվան պետական կոնսերվատորիայի խմբավարական (1952) և ստեղծագործական (1967) բաժիններում։
1952-1954 թվականներին եղել է Լենինականի Կարա-Մուրզայի անվան երաժշտական ուսումնարանի տնօրենը։ 1955-1961 թվականներին ղեկավարել է Հայաստանի խորեոգրաֆիկ ուսումնարանը։ 1961-1964 թվականներին եղել է Հայաստանի ռադիոյի երաժշտական հաղորդումների գլխավոր խմբագիրը, 1964-1966 թվականներին՝ Հայֆիլհարմոնիայի տնօրենը։ 1966 թվականին ստեղծել է Ալեքսանդր Սպենդիարյանի տուն-թանգարանը և մինչև 1972 թվականը եղել է տնօրենը։ 1972-1975 թվականներին եղել է Հայպետէստրադայի գեղարվեստական ղեկավար և տնօրեն, 1981-1986 թվականներին՝ Հայաստանի ժողովրդական գործիքների համույթի գեղարվեստական ղեկավար և գլխավոր դիրիժոր։
ՀԽՍՀ արվեստի գործիչ Վլադիլեն Բալյանը 2002 թվականի արժանացել է Մովսես Խորենացու մեդալի, 2011-ին՝ ՀՀ ժողովրդական արտիստի կոչման։
Տաղանդավոր երաժիշտը ստեղծագործել է տարբեր ժանրերում՝ սիմֆոնիկ, կամերային, երգչախմբային։ Հեղինակել է բազմաթիվ երգեր, որոնցից են, օրինակ, «Սերս գաղտնի թող մնա», «Գյումրի-Լենինական» և այլ հանրահայտ երգեր։
Վլադիլեն Բալյանը Հայաստանի կոմպոզիտորների, Ժուռնալիստների, Մոսկվայի հայերի միությունների անդամ էր, 2001 թվականից՝ աշխարհի ժողովուրդների հոգևոր միասնության միջազգային ակադեմիայի անդամ, ինչպես նաև «Հայաստան-Լիբանան» կազմակերպության նախագահն էր։
