Աթենքի մոտակայքում բռնկված հրդեհի հետևանքով 94 տուն է այրվել
Հունաստանի քաղաքացիական պաշտպանության և ճգնաժամային կառավարման նախարարի տեղակալ Նիկոս Հարդալիասը հայտարարել է, որ Աթենքի հյուսիսային արվարձանում` Վարիբոբի գյուղի մոտ, 94 տուն ամբողջությամբ կամ մասամբ այրվել է, այրվել է նաև 82 ավտոմեքենա, այս մասին արտահերթ ճեպազրույցում հայտարարել է Հունաստանի քաղաքացիական պաշտպանության և հակաճգնաժամային կառավարման փոխնախարար Նիկոս Հարդալիասը, հաղորդել է «ՌԻԱ Նովոստին»:
«Նախնական գնահատականներով, հրդեհի մակերեսը կազմել է 12.500 ստրեմ (1250 հա): Առաջին տեղեկություններով, ինչը պետք է հաստատվի իրավասու ծառայությունների կողմից, 76 տուն լուրջ վնասվել է, 18 տուն` մասամբ»,- ասել է Հարդալիասը:
«Լուրջ վնասվել է նաև մարզի 27 ձեռնարկություն: Ամբողջությամբ ոչնչացվել է 82 ավտոմեքենա: 64 ավտոմեքենա վնասվել է մասամբ»,- ասաց փոխնախարարը:
Հարդալիասը հայտնել է, որ լուսադեմին կրակի չորս ճակատներից մեկն ակտիվ է մնացել, մնացածը նվազում են:
Հրդեհի մարման աշխատանքներին ներգրավված է ավիացիան, հինգ ինքնաթիռ և ինը ուղղաթիռ, իրավիճակը բարելավվում է, հայտնել է փոխնախարարը:
Աթենքի հյուսիսային արվարձանում` Ահարնե շրջանի Վարիբոբի բնակավայրի մոտ բռնկված հրդեհը սկսվել էր երեքշաբթի կեսօրին: Մոտակայքում է գտնվում Թաթոյի նախկին թագավորական նստավայրը: Մի քանի բնակավայրի բնակիչներ տարհանվել են, ոստիկաններն արգելափակել են մայրուղու երթևեկությունը հրդեհի տարածքում: Ծուխը ծածկել է Աթենքը: Քաղաքացիներին խորհուրդ է տրվում պինդ փակել պատուհաններն ու դռները, փողոց դուրս գալ դիմակով:
Իշխանությունների տվյալներով` Հունաստանում ռեկորդային շոգ է գրանցվել 40 տարվա ընթացքում: Երեքշաբթի օդի ջերմաստիճանը որոշ շրջաններում հասել է 47 աստիճանի: