Օդերևութաբանը նախազգուշացրել է. Ռուսաստանի հարավում սպասվում է մինչև 43 աստիճան տաքություն
Մինչև ընթացիկ շաբաթվա վերջ Ռուսաստանի եվրոպական մասում անոմալ շոգ եղանակ է տիրելու: Ինչպես փոխանցում է «Ռեգնում» գործակալությունը, այս մասին օգոստոսի 4-ին հայտնել է ՌԴ Հիդրոօդերևութաբանական կայանի ղեկավար Ռոման Վիլֆանդը:
«Հարավում շատ շոգ եղանակ է, անգամ ծովի մեղմացուցիչ ազդեցությունը չի նպաստում ջերմաստիճանի +30 աստիճանից իջեցմանն ափամերձ շրջաններում: Մինչև աշխատանքային շաբաթվա վերջ շոգ եղանակ է լինելու, և դա վտանգավոր երևույթ է»,- ասել է մասնագետը:
Միևնույն ժամանակ օդերևութաբանը մասնավորեցրել է, որ Սոչիի շրջանում այդ ժամանակ ակնկալվում է մինչև 35 աստիճան տաքություն` ըստ Ցելսիուսի, Սիմֆերապոլում` +30, +37, Սևաստոպոլում` +30, +35 աստիճան:
Վիլֆանդն ընդգծել է, որ Ռուսաստանի հարավային շրջաններում ավելի շոգ է լինելու: «Աստրախանի մարզում շատ շոգ է: Մինչև +43 աստիճան Վոլգոգրադի մարզում, Ռոստովի մարզում նույնպես ակնկալվում է մինչև 43 աստիճան տաքություն, ինչպես նաև Ստավրոպոլի հարավում»,- հավելել է նա:
