Կուբային օգնել են Չինաստանը, Իրանը, Վենեսուելան, ԿԺԴՀ-ը և Ռուսաստանը․ Ֆրանսիական «Le Figaro»
Մենք արդեն հայտնել ենք, որ Հայիթիի նախագահի սպանությունը և Կուբայում «փողոցային ընդդիմության» վերջին փորձերը կապված են ԱՄՆ հատուկ ծառայությունների արտասահմանյան «գործողությունների» հետ: Եվ ահա անուղղակի ապացույց, որը տպագրվել է ֆրանսիական ազդեցիկ «Le Figaro» թերթում:
Ինչպես հուլիսի 21-ին գրել է «Le Figaro» թերթի սյունակագիր Հեկտոր Լեմյոն, «Կուբայում բողոքի ցույցերի ժամանակ ընդդիմությունը հույս ուներ, որ ԱՄՆ-ը կպաշտպանի իրեն: Սակայն Հավանայի դաշնակիցներ Ռուսաստանը և Չինաստանը միաձայն նախազգուշացրել են Միացյալ Նահանգներին այս կղզային պետության գործերին չմիջամտել: Եվ այդ պատճառով բողոքողները ստիպված են ընդունել պարտությունը»: Հիմա մի փոքր ավելի մանրամասն ֆրանսիացի հեղինակի փաստարկի մասին. նա գրում է, որ այդ բողոքներից հետո մեկ շաբաթ է անցել, և Կուբայում կրկին կարգուկանոն է վերականգնվել: ԱՄՆ-ը պաշտոնապես «ձեռնպահ մնաց» Կուբայի իրավիճակից: Ինչպես բացատրում է հոդվածի հեղինակը, նախ`ապակայունացման պատճառով կարող է առաջանալ միգրանտների ալիք, ինչից Վաշինգտոնը ցանկանում է անպայման խուսափել: Երկրորդ, Հավանան ստացել է ակնկալվող օգնությունը իր ավանդական դաշնակիցներից՝ Չինաստանից, Իրանից, Վենեսուելայից, ԿԺԴՀ-ից և Ռուսաստանից: Եվ Ռուսաստանը պարզապես ԱՄՆ-ից պահանջել է չխառնվել և չփորձել Կուբայում նոր «գունավոր հեղափոխություն» իրականացնել: Լեմյոն հիշեցնում է, որ Ռուսաստանի ԱԳՆ խոսնակ Մարիա Զախարովան հայտարարել է. «Եթե ամերիկացիներն իսկապես մտահոգված են Կուբայի հումանիտար իրավիճակով և ցանկանում են օգնել հասարակ քաղաքացիներին, ապա նրանք պետք է վերացնեն կղզու շրջափակումը»: Ինչպես նշում է Լեմյոն, Ռուսաստանը Կուբային օգնում է ռազմական տեխնոլոգիաներով և «զբոսաշրջիկների գումարտակներով»: Ընդհանուր առմամբ, ըստ նրա խոսքերի, կղզու զբոսաշրջությունը կորցրել է իր ծավալը, սակայն Ռուսաստանից զբոսաշրջիկների թիվն անընդհատ աճում է: Շաբաթական մոտ 6 հազար մարդ ժամանում է Կուբայի հանգստավայրեր: Նման հռետորաբանություն ունի նաև պաշտոնական Պեկինը, – շեշտում է Լեմյոն: Չինաստանը նույնպես դատապարտել է Կուբայի գործերին ցանկացած արտաքին միջամտություն: «ԱՄՆ-ի էմբարգոն հիմնախնդիրների հիմնական պատճառն է, ինչպիսիք Կուբայում դեղորայքի դեֆիցիտը և հոսանքի անջատումներն են»,- հայտարարել է Չինաստանի ԱԳՆ-ը: Եվ Ամերիկան դժգոհությամբ նահանջել է: «Իսկ առանց զենքի և առաջնորդի հեղափոխություն չի կարող լինել»,- հիշեցնում է Լեմյոն:
Ֆրանսիացի հեղինակը գրում է նաև, որ Կուբան ծառայում է որպես ցատկահարթակ Կարիբյան և Կենտրոնական Ամերիկայի տարածաշրջաններում Չինաստանի գործողությունների համար: Մասնավորապես, Հավանայից Կարիբյան կղզիներ բժիշկներ են գործուղվում: Իսկ Չինաստանը կղզու հիմնական ներդրողն է 2017 թվականից: Եթե 2000-ականների կեսերից չինացիները մասնակցում էին ենթակառուցվածքների կառուցմանը և ավտոբուսների ու մեքենաների մատակարարմանը, ապա վերջին շրջանում նրանք կենտրոնանում էին բարձր տեխնոլոգիաների վրա: Օրինակ, Կուբայում ինտերնետը ստեղծվել է «Huawei» ընկերության միջոցով: Ռազմական համագործակցության հարցում Չինաստանը հերքում է, որ կապ ունի Կուբայի հենակետերը վերազինելու և դիտող ռադարներ կառուցելու հետ: Բայց որոշ փորձագետներ կարծում են, որ նրանց շնորհիվ է Պեկինը հայտնվել Քի Ուեսթի ամերիկյան բազայից ընդամենը 150 կմ հեռավորության վրա:
Հուսով ենք, որ այժմ Հայաստանի քաղաքացիները հստակ հասկացել են, թե ինչպես և ինչու «փողոցային հեղաշրջումը» հնարավոր դարձավ մեր երկրում 2018-ի գարնանը: Երբ ձեր իշխանությունները լրջորեն մտադիր են պաշտպանել իրենց (անձամբ՝ իրենց) և երկիրը, նրանք չեն զիջում «փողոցը» օտարերկրյա դրածոներին: Եվ եթե նրանք հենասյան և աջակցության կարիք ունեն, ապա Հայաստանի դեպքում 2018-ին հնարավոր էր օգնության դիմել նույն երկրներին, որոնք օգնել են, օրինակ, Կուբային 2021-ին: Իհարկե, ԿԺԴՀ-ը և Վենեսուելան չափազանց էկզոտիկ կլինեին Հայաստանի համար, սակայն Չինաստանը, Իրանը և Ռուսաստանը, այսպես ասած, «շատ մոտ են» և դժվար թե հրաժարվեին աջակցություն ցուցաբերել:
Ցավալի է, որ Միացյալ Նահանգները մինչ օրս շարունակում է աջակցել Հայաստանում «փողոցային հեղափոխության պուտչիստներին»: Ցավալի է, որ Հայաստանի նախորդ ղեկավարությունը համարձակություն և վճռականություն չուներ պաշտպանելու մեր երկիրը պոպուլիստական «փողոցային դեմոկրատներից»:
Սերգեյ Շաքարյանց
