Ալիևի և Պուտինի հանդիպումը տեղի է ունենում ևս մեկ եռակողմ համաձայնագրի ստորագրմանն ընդառաջ. ռուս քաղաքագետ
Ալիևի և Պուտինի հանդիպումը տեղի է ունենում Մոսկվայի, Բաքվի և Երևանի միջև ևս մեկ եռակողմ համաձայնագրի ստորագրմանն ընդառաջ: Նման կարծիք է հայտնել ռուս քաղաքագետ Ալեքսանդր Փերենջիևը:
«Փարիզի դիվանագիտական ակտիվությունն այս հանդիպմանը միայն անուղղակի առնչություն ունի, նրանք փորձում էին նստել հեռացող գնացքը»,- «Կովկասյան բյուրո» թելագրամյան ալիքին հայտնել է ռուս քաղաքագետը:
Նրա խոսքով` ՌԴ և Ադրբեջանի նախագահների հանդիպումը նվիրված է Ադրբեջանի արևմտյան շրջանների մոտակայքում տեղի ունեցող գործընթացներին, որոնք սկսվել են 2020 թվականի նոյեմբերին և զարգացում են ստացել 2021 թվականի հունվարին:
«Դրանք բոլորը տեղի են ունենում բարդ իրավիճակում: Դրա համար էլ անհրաժեշտ է, ինչպես հաղորդվում էր ԶԼՄ-ներում, «դիրքորոշումների հստակեցում» իրականացնել` հայ-ադրբեջանական հակամարտության հետագա կարգավորման մեխանիզմները հստակցնելու, ինչպես նաև Հարավային Կովկասում հաղորդակցությունների զարգացմանն առնչվող արդեն ձեռք բերված համաձայնագրերն իրագործելու համար: Այսինքն, այդ թվում և Զանգեզուրի միջանցքի ձևավորման համար` որպես 2021 թվականի հունվարին կնքված համաձայնության իրականացման «ամենացավոտ» տարր»,- եզրափակել է մասնագետը:
