Վրաստանում ցուցարարները վերջնագիր են ներկայացրել վարչապետին
Թբիլիսիի կենտրոնում հավաքված լրագրողները, ընդդիմադիրները և նրանց կողմնակիցները խոստացել են շարունակել բողոքի ցույցերը, եթե վարչապետ Իրակլի Ղարիբաշվիլին չկատարի իրենց պահանջը և հրաժարական տա: Բողոքի ակցիան ուղիղ հեռարձակում են բոլոր հեռուստաընկերությունները: Այս մասին գրում է «ՌԻԱ Նովոստի»-ն:
Ցուցարարները հավաքվել էին քաղաքի կենտրոնում այն բանից հետո, երբ հայտնի դարձավ հուլիսի 5-ին ԼԳԲՏ համայնքի դեմ ցույցի ժամանակ ծեծի ենթարկված «Պիրվելի» հեռուստաընկերության օպերատոր Լեքսո Լաշկարավայի մահվան մասին:
Բողոքի ցույցերին մասնակցել էին նաև լրագրողներ, ովքեր պնդում էին, որ հենց Ղարիբաշվիլու հայտարարությունը՝ ԼԳԲՏ ներկայացուցիչների մասնակցությամբ «Արժանապատվության երթ» անցկացնելու աննպատակահարմարության մասին, հարուցեց ագրեսիա:
Լաշկարավայի մահվան պատճառները դեռ հայտնի չեն, նշանակվել են փորձաքննություններ: Օպերատորը վիրավորվել է հուլիսի 5-ի բողոքի ցույցերի ժամանակ, մի քանի օր անցկացրել է հիվանդանոցում՝ աչքի վնասվածքով, այնուհետև դուրս է գրվել: Ներքին գործերի նախարարությունը հայտարարել է ծեծի մեջ ներգրավված չորս անձանց ձերբակալելու մասին:
«Եթե կառավարությունը, վարչապետը և Պետական անվտանգության ծառայության ղեկավարը հրաժարական չտան մինչև ժամը 12:00-ը, բողոքի ցույցերը կշարունակվեն: Հաջորդ հանրահավաքը տեղի կունենա երկուշաբթի, ժամը 18:00», – հայտարարել էր ցուցարարներից մեկը:
Հուլիսի 1-ին Թբիլիսիում սկսվել է «Արժանապատվության շաբաթը», որի ժամանակ ԼԳԲՏ համայնքի ներկայացուցիչները մի շարք միջոցառումներ են անցկացրել: Եզրափակիչ երթը պետք է տեղի ունենար հուլիսի 5-ին: Սեռական փոքրամասնությունների հակառակորդներն առավոտյան փակել էին Ռուսթավելիի կենտրոնական պողոտան: Նրանք փայտեր ու շշեր են նետել ընդդիմադիր հեռուստաընկերությունների թղթակիցների և օպերատորների վրա: Ավելի քան 50 լրագրող վիրավորվել է: Ավելի ուշ կազմակերպիչները հայտարարեցին երթը չեղյալ հայտարարելու մասին:
