Վրաստանում այսօրվանից մեկնարկում են զանգվածային պատվաստումները

Այսօրվանից Վրաստանում մեկնարկում են կորոնավիրուսի դեմ զանգվածային պատվաստումները: Ինչպես հուլիսի 2-ին կայացած ճեպազրույցում հայտարարել է Վրաստանի վարչապետ Իրակլի Ղարիբաշվիլին, Վրաստանը ստացել է «Սինովակ» և «Սինոֆարմ» պատվաստանյութերի միլիոն դեղաչափ և երկիրը պատրաստ է հուլիսի 5-ին սկսել զանգվածային պատվաստումները: Ստացած պատվաստանյութի 500 000 դեղաչափը «Սինոֆարմն» է, իսկ մյուս 500 000-ը «Սինովակը»: Այս մասին գրում է վրացական Առաջին ալիքը։

Միևնույն ժամանակ, ըստ վարչապետի, առաջիկա մի քանի շաբաթվա ընթացքում Վրաստան կբերվի  պատվաստանյութերի լրացուցիչ միլիոն դեղաչափ:

Առողջապահության նախարարությունում ասում են, որ պատվաստումների համար ամբողջ երկրում կենտրոնացվել է պատվաստողների մինչև 350 խումբ:

«Աշխարհագրական հասանելիությունն ապահովելու համար առողջապահության նախարարությունն արդեն մշակել է պատվաստանյութերի բաշխման համազգային սխեմա», – հայտնել են առողջապահության նախարարությունից:

Հիվանդությունների վերահսկման ազգային կենտրոնի փոխանցմամբ, պատվաստումների ամրագրման էլեկտրոնային պորտալը, որը կիբերհարձակման պատճառով դադարեցրել էր գործունեությունը հուլիսի 3-ին, վերականգնվել է:

Նրանց խոսքով, երեկ՝ ժամը 19:00-ին, էլեկտրոնային պորտալում գրանցվել է «Սինոֆարմ» պատվաստանյութով պատվաստում ցանկացողների մինչև 14 000 ամրագրում:

Թբիլիսիի ինֆեկցիոն հիվանդանոցի տնօրեն Թենգիզ Ցերցվաձեի խոսքով, պատվաստումների համար գրանցման պորտալում ուշացում չկա: Նրա խոսքով, տեխնիկական խնդիրների դեպքում քաղաքացիները կկարողանան գրանցվել կլինիկաներում: