Շուռնուխի ղեկավարի եղբորը ծնկաչոք բերման ենթարկելու դեպքի փաստով քրգործ է հարուցվել
Փաստաբան Գայանե Պապոյանը գրառում է արել՝ տեղեկացնելով, որ որպես վկա հրավիրվել էր ՀՔԾ հարցաքննության՝ Շուռնուխի վարչական ղեկավարի եղբորը՝ Արարատ Աղաբեկյանին (Աշխարհաբեկ), ՔԿ բերման ենթարկելու հանգամանքների վերաբերյալ իր կողմից կատարված տեսագրության հիման վրա հարուցված քրեական գործի շրջանակում։
«Հարցաքննությունը երեկ էր, պարզվեց հետևյալը.
Քրեական գործը հարուցվել է ՀՀ Քրեական օրենսգրքի 309-րդ հոդվածի 2-րդ մասի հատկանիշներով՝ պետական ծառայություն իրականացնող պաշտոնատար անձանց կողմից դիտավորությամբ իրենց լիազորությունների շրջանակից ակնհայտորեն դուրս եկող բռնությամբ զուգորդված առերևույթ գործողություններ կատարելու դեպքի առթիվ»,-գրել է նա։
Հիշեցնենք, որ Գայանե Պապոյանը տեսանյութ էր հրապարակել, թե ինչպես են Շուռնուխի ղեկավարի եղբորը ծնկաչոք տանում Քննչական կոմիտե, նա գոռում էր՝ «թոքաբորբ եմ, մեռնում եմ»:
