Երևանի Խաչքարերի պուրակում բացվել է «Արցախի բարիքներ» խորագրով ցուցահանդես-տոնավաճառ
Այսօր Երևան քաղաքի Խաչքարերի պուրակում բացվել է «Արցախի բարիքներ» խորագրով ցուցահանդես-տոնավաճառը: Այս մասին հայտնում են Ստեփանակերտի քաղաքապետարանի ֆեյսբուքյան էջում:
Այն նախաձեռնել են Ստեփանակերտի և Երևանի քաղաքապետարանները՝ ԱՀ ԷԳ, ԿԳՄՍ նախարարությունների և Արցախի ներդրումային հիմնադրամի աջակցությամբ: Ներկայացված է «Արտադրված է Արցախում» մակնշմամբ ապրանքների լայն տեսականի՝ ձեռագործ աշխատանքներ, վերամշակող գործարանների արտադրատեսակներ և այլն:
Նպատակը տեղական բրենդների հանրահռչակումն է ու Արցախում բիզնես միջավայրի բարելավումը: Այն նաև հայկական երկու գլխավոր քաղաքների միջև փոխգործակցության խորացման հերթական դրսևորումն է: Բացի այդ՝ նման ձևաչափի միջոցառումը հնարավորություն է Հայաստանում հանգրվանած տեղահանված արցախցիների համար՝ պոտենցիալ սպառողին ներկայացնելու իրենց ձեռքի աշխատանքը:
