Մեռած է «Նաիրիտը»՝ կամ թաղեն, կամ վառեն․ նաիրիտցիների ակցիան
«Նաիրիտ» գործարանի աշխատակիցները բողոքի ակցիա են անում կառավարության մոտ՝ աշխատավարձերի և անվտանգության հարցերով: Ակցիայի մասնակիցներին հայտնի է դարձել, որ վաղը քննարկում է լինելու, հրավիրելու են շահագրգիռ կողմերին, նաև գործարանի աշխատակիցներին:
«Թե քանի օրում աշխատավարձի հարցը կլուծվի, երբ կլուծվի, վաղը կանդրադառնան, որոշվելու է՝ ինչ եղանակով վճարում կատարեն, նաև ում միջոցով վճարվի»,- նշեց կառավարության ներկայացուցչի հետ հանդիպած նաիրիտցին:
«Մեռած է «Նաիրիտը»՝ կամ թաղեն, կամ վառեն, ոչ այն են անում, ոչ այն, թողել են խոլերայի բուն: 25 հազար տոննա հրդեհավտանգ քիմիական նյութեր կան, պետք է վնասազերծեն, որպեսզի էկոլոգիապես վնաս չտա, մարդու առողջության վրա չազդի»,- նշեց ակցիայի մասնակիցներից մեկը:
Մեկ այլ նաիրիտցի շարունակեց. ««Նաիրիտը» Հայաստանի համար վտանգավոր գործարան է, ունի հազարավոր տոննա պայթունցիկ նյութեր»:
Նրանք նշեցին, որ եթե չլուծեն իրենց հարցերը, անժամկետ նստացույց են սկսելու կառավարության դիմաց, 7 ամիս սպասել են: