Չէի կարող չարձագանքել ուրախությամբ, որ իմ գործընկերները վերադարձան հայամետ քաղաքականության. Տարոն Սիմոնյան
Այն, ինչ կազմակերպվում է Ադրբեջանի ղեկավարության կողմից, միայն կարելի է որակել որպես ռասիստական պետության քաղաքականություն, որն ունի էթնիկ ատելություն հայերի նկատմամբ: Այս մասին Ազգային ժողովում իր ելույթում ասաց «Իմ քայլը» խմբակցության ղեկավար Լիլիթ Մակունցը՝ անդրադառնալով Ադրբեջանի կողմից Շուշիի Սուրբ Ղազանչեցոց եկեղեցում արվող շինաշխատանքներին, գմբեթները հանելուն:
«Տպավորություն է թողնում, որ այս մարդիկ չունեն մշակութային պատմություն և հենց նման մոտեցմամբ էլ վերաբերվում են հայկական մշակույթին՝ փորձելով վերացնել բոլոր հետքերը»,-ասաց նա:
Նա նշեց, որ այս հարցը պետք է լինի միջազգային կառույցների, Մինսկի խմբի համանախագահության ուշադրության կենտրոնում: «Հայության հանդեպ էթնիկ ատելությունը չի կարող չունենալ արձագանք»,-ասաց նա: Նշենք, որ այս հարցին միջազգայի իրավունքի տեսանկյունից անդրադարձավ նաև «Իմ քայլը» խմբակցությունից Վլադիմիր Վարդանյանը:
Ազգային ժողովի նախագահ Արարատ Միրզոյանը նշեց, որ այդ բարբարոսությունը և գերության մեջ կամ որևէ այլ կարգավիճակով Ադրբեջանում պահվող հայերի նկատմամբ վերաբերմունքը և խայտառակ պուրակի բացումը հերթական վկայությունն է այն բանի, որ Արցախի հայության անվտանգ գոյությունն Ադրբեջանի կազմում անհնար է: «Աշխարհը պետք է ճանաչի Արցախի հայության ինքնորոշման իրավունքը»,-ասաց նա:
Արձագանքելով ելույթներին՝ «Լուսավոր Հայաստան» խմբակցության պատգամավոր Տարոն Սիմոնյանն ասաց. «Ես չէի կարող չարձագանքել ուրախությամբ, որ իմ գործընկերներն ի վերջո վերադարձան հայամետ քաղաքականության, և իմ գործընկեր պարոն Վարդանյանը նաև վերադարձավ իր հիմնական մասնագիտական առաքելություն՝ միջազգային մարդասիրական իրավունքին»:
Այս խոսքերը դահլիճում առաջացրեց «Իմ քայլը» խմբակցության պատգամավորների դժգոհությունը, և ԱԺ նախագահ Արարատ Միրզոյանը արձագանքեց. «Դահլիճում գոռգոռոցները անտեղի են, իսկապես հնչեցրած արտահայտությունը վիրավորական է մեզ համար, հայամետ քաղաքականություն թող վերադառնան նրանք, ովքեր հեռացել են այդ քաղաքականությունից»: Իսկ Տարոն Սիմոնյանը հավելեց, որ թող ժողովուրդն ինքը դատի:
