Ընտրություններում անցողիկ շեմերը կփոխվե՞ն. պայմանավորված է ՀՀ նախագահով. «Հրապարակ»

«Հրապարակ» թերթը գրում է. «Խորհրդարանն առաջիկա արտահերթ նիստում կքննարկի Ընտրական օրենսգրքում փոփոխությունների ծավալուն փաթեթը, որն օրերս է Վենետիկի հանձնաժողովի քննությանը ենթարկվել։ Ապա ԸՕ նոր դրույթներն ուժի մեջ կմտնեն հաջորդ տարվա հունվարից և չեն տարածվի առաջիկա ընտրությունների վրա։

Սակայն ԱԺ ընտրական բարեփոխումների աշխատանքային խմբի համակարգող, իմքայլական Համազասպ Դանիելյանը չբացառեց, որ որոշ դրույթներ ուժի մեջ կմտնեն մինչև հունիսի 20-ը։ «Որևէ դրույթի ուժի մեջ մտնելու հավանականությունը մեծապես պայմանավորված է լինելու, թե երբ կստորագրվի նախագահի կողմից»,- ասաց նա՝ չմանրամասնելով, թե որ դրույթների մասին է խոսքը։

Հիշեցնենք․ փաթեթում է ներառված ընտրությունների անցողիկ շեմի իջեցումը,  կուսակցությունների համար 1%-ով` կդառնա 4%, դաշինքների համար՝ բարձրացում․ 2 կուսակցության դաշինքի դեպքում անցողիկ շեմը կդառնա 8%, 3 կուսակցությունների դաշինքի դեպքում` 9%, 3-ից ավելի կուսակցությունների դաշինքի դեպքում`10%։ Հարցրինք՝ կա՞ն դրույթներ, որոնք Վենետիկի հանձնաժողովի բացասական կարծիքին են արժանացել։ «Այո, դրա ամենացայտուն օրինակներից մեկը ընտրողների ստորագրված ցուցակների հրապարակումն է։ Ընտրության գաղտնիության սկզբունքի հետ է կապված»։

Հիշեցնենք, որ 2016-ին, երբ ՀՀԿ-ն ընդունեց ԸՕ-ն, ընդդիմությունը բողոքի ալիք բարձրացրեց, և իշխանությունը ստիպված եղավ զիջումների գնալ ու համաձայնել ընդդիմության առաջարկի հետ՝ հրապարակել ընտրողների ստորագրված ցուցակները, հիմա, փաստորեն, այդ դրույթը հանվում է։

«2017-ին, երբ այդ փոփոխությունը մտցվեց, քանի որ ընդդիմությունն էր պահանջում, և ՀՀԿ-ն զիջեց, մինչև հիմա էլ եվրոպական կառույցների բոլոր կարծիքներում ասվում է, որ լավ լուծում չէ՝ գաղտնիության առումով», սակայն այն, ըստ ամենայնի, չի հանվի նախագծից․ «Մենք չենք հրաժարվել, որովհետև ստորագրված ցուցակներն էապես նպաստել են ընտրությունների նկատմամբ վստահության ավելացմանը։ Այլ հարց է, երբ ժամանակի ընթացքում հնարավոր լինի ընտրացուցակները մաքրել, կարելի է հետևել եվրոպական ստանդարտներին»:

Առավել մանրամասն կարդացեք թերթի այսօրվա համարում։