Մենք ընդամենը ուզում էինք մեզ հուզող հարցերի պատասխանները ստանալ․ Քաջարանի համայնքապետը՝ Փաշինյանի Սյունիք այցի ընթացքում բողոքի ակցիայի մասին
Ես որպես ժողովրդի կողմից ընտրած համայնքապետ և անձ՝ ուզում եմ ասել՝ մենք կարող էինք ակցիան կազմակերպել, քանի որ վայելում ենք ժողովրդի հարգանքը, բայց երբ իմացանք՝ Փաշինյանը գալիս է, ինքաբուխ ակցիա կազմակերպվեց: Այս մասին tert.am-ի փոխանցմամբ դատարանի բակում լրագրողների հետ զրույցում ասաց Քաջարանի համայնքի ղեկավար Մանվել Փարազանյանը:
«Քաջարանցիները հարց ունեին և բաց տեքստով ուզում էին ուղղել իրենց հարցերը վարչապետին, բայց շատ հարցեր մնացին օդում կախված և անպատասխան: Սյունեցիները մտահոգված են իրենց անվտանգությամբ, այդ իսկ պատճառով մենք ճանապարհ չենք փակել, մենք ընդամենը ուզում էինք մեզ հուզող հարցերի պատասխանները ստանալ»,- ասաց Փարազանյանը:
Համայնքապետը անդրադարձավ նաև Մեղրիի քաղաքապետ Մխիթար Զաքարյանի ձերբակալմանը. «Մխիթար Զաքարյանինը կարած գործ է, մարդիկ ուղղակի հեքիաթներ են պատմում Զաքարյանի հետ կապված, մարդը ուղղակի իջել է, որպեսզի իրավիճակը հասկանա, բախումները կասեցնի, բայց դեպքերը Ագարակում և Մեղրիում էմոցիոնալ են ընթացել»,- նշեց նա:
Հիշեցնենք՝ դատարանը քննում է Մեղրիի քաղաքապետ Մխիթար Զաքարյանի ձերբակալման իրավաչափության հարցը: Զաքարյանին ձերբակալելու իրավաչափության դեմ ներկայացված բողոքը մակագրվել է Երեւանի ընդհանուր իրավասության դատարանի դատավոր Մանվել Շահվերդյանին։
Նշենք, որ Մեղրիի քաղաքապետ Մխիթար Զաքարյանին մեղադրանք է առաջադրվել ՀՀ ՔՕ 258-րդ հոդվածի 3-րդ մասի 1-ին, 2-րդ և 5-րդ կետերի (խուլիգանություն) հատկանիշներով։Նշենք՝ ապրիլի 21-ին Սյունիքում Նիկոլ Փաշինյանի դեմ իրականացվող բողոքի ակցիաների առթիվ հարուցված քրգործի շրջանակներում մեղադրանք է առաջադրվել 19 անձի:
