Արցախի ՄԻՊ-ի տվյալներով՝ ունենք 60 քաղաքացիական զոհ, 40 հազար արցախցի մնացել է անօթևան

Արցախի Մարդու իրավունքների պաշտպանի աշխատակազմի հաշվարկներով` Ադրբեջանի սանձազերծած պատերազմի հետևանքով 60 քաղաքացիական անձ է զոհվել, ընդ որում 39-ը՝ ուղիղ թիրախավորմամբ, մինչև 40 հազար արցախցի է մնացել անօթևան: Այս մասին դեկտեմբերի 22-ին հրավիրված մամուլի ասուլիսի ընթացքում ասաց Արցախի ՄԻՊ Արտակ Բեգլարյանը:

«Մեր հաշվարկներով` մինչև 40 հազար անձ անօթևան է մնացել միայն ռազմական գործողությունների ու քաղաքական պայմանավորվածության հետևանքով տարածքների օկուպացման պատճառով: Այդ անձանց զգալի մասն արդեն Արցախի Հանրապետությունում է»,- ասաց Բեգլարյանը:

Նա հավելեց, որ նշված անձանց համար առաջին հերթին պետք է լուծել ժամանակավոր կացարանի խնդիրը: