Դատախազությունն այս պահին ունի առնվազն մեկ գործառույթ՝ վարչապետի պաշտոնը զբաղեցնողի լիազորությունների ժամանակավորապես դադարեցումն է. Արամ Վարդևանյան
«Իրավաբանական համայնքը ստեղծված իրավիճակում ազդակ է փոխանցում թե իրավական որակումների, թե հայտարարությունների, թե դիրքորոշման մասով և պահանջում է իրավապահ համակարգից կոնկրետ գործողություններ: Տվյալ դեպքում խոսքը, իհարկե, դատախազության մասին է»,- լրագրողների հետ զրույցում ասաց փաստաբան Արամ Վարդևանյանը, որը միացել է փաստաբանների երթին դեպի ՀՀ Ազգային ժողով, այնուհետև՝ ՀՀ գլխավոր դատախազություն:
Նրա խոսքով, մարդիկ գիտեն, թե Հատուկ քննչական ծառայությունը ինչ աստիճան քաղաքականացված մարմին է, բայց մյուս կողմից կա ԱԱԾ քննչական դեպարտամենտ, որտեղ ևս արցախյան դեպքերի հետ կապված քննություն է կատարվում է: Օրինակ, Արցախի նախագահ Արայիկ Հարությունյանի հայտնի ձայնագրությունը գտնվում է ԱԱԾ քննչական դեպարտամենտի վարույթում:
«Դատախազությունն այս պահին ունի առնվազն մեկ գործառույթ՝ վարչապետի պաշտոնը զբաղեցնողի լիազորությունների ժամանակավորապես դադարեցումն է: Պարզ է, չէ, որ այն պայմաններում, երբ այդ անձը կարողանում է կառավարության շենք հրավիրել գլխավոր դատախազին, ՀՔԾ պետին, վճռաբեկ դատարանի դատավորներին, չի կարող լինել օբյեկտիվ քննություն»,- նշեց փաստաբանը:
Հարցին՝ այս օրերին ինչպե՞ս եք գնահատում իրավապահ մարմինների աշխատանքը, Ա. Վարդևանյանն ասաց՝ խիստ բացասական:
«Կոնկրետ այն գործողությունները, որոնք արվեցին Աշոտ Մինասյանի, Արթուր Վանեցյանի, Վահրամ Բաղդասարյանի, գեղանկարիչ Աշոտ Ավագյանի նկատմամբ, իբրև սպանության նախապատրաստման մասով, խայտառականություն էր: Վստահեցնում եմ՝ իրավական հետևանքներ ունենալու են»,-նշեց նա:
Ըստ նրա, այն պայմաններում, երբ ունեն կոնկրետ դեպքեր, որոնք պետք է քննության առարկա դառնան, կալանավորման միջնորդություններ ներկայացվեն, դրանք անտեսվում են, ԱԱԾ նախկին պետ Միքայել Համբարձումյանը հայտնում է ապօրինի հրամանների հետ կապված խնդիրներ են եղել, դրանք անտեսվում են, բայց լեգենդար հրամանատար Աշոտ Մինասյանին փորձում են կալանավորե՞ն:
«Իրավապահ համակարգն ունի բոլոր հնարավորությունները իր մեջքն ուղղելու, իրական, օբյկետիվ քննության իրականացնելու համար:
Դրա համար պետք է մեկ գործիք իրացնեն՝ լիազորությունները ժամանակավորապես դադարեցնեն: Չեմ ասում՝ ձերբակալման, կալանավորման միջնորդությունների մասին, որոնք ևս պետք է լինեն: Ես առնվազն մեկն եմ նշում»,- ասաց Ա. Վարդևանյանը: