Կողմերը պետք է կանգ առնեն նոյեմբերի 10-ի դրությամբ առկա դիրքերում, ԼՂ կարգավիճակը պետք է մնա անփոփոխ, պետք է ֆիքսվի ստատուս քվոն. Վլադիմիր Պուտին

Այսօր՝ դեկտեմբերի 17-ին ՌԴ նախագահի նստավայրում կայացել է Վլադիմիր Պուտինի տարեկան ամփոփիչ մամուլի ասուլիսը։ Այս մասին տեղեկանում ենք «ՌԻԱ Նովոստի» գործակալությունից։

Ասուլիսի շրջանակում Պուտինն անդրադարձել է նաև Լեռնային Ղարաբաղի խնդրին՝ ընդգծելով, որ իրավիճակը վերահսկողությունից դուրս էր եկել: Լարվածությունը, նրա խոսքով, տևում էր երկար տարիներ:

Նախագահը կասկած է հայտնել առ այն, որ հակամարտությունը բռնկվել է արտաքին միջամտության պատճառով:

«Մոսկվայի դիրքորոշումը Լեռնային Ղարաբաղի հարցում հետևյալն է՝ կարգավորում առանց արյունահեղության»,- բացատրել է Պուտինը:

«Երկար տարիներ Ռուսաստանը ելնում էր այն նախադրյալից, որ Ադրբեջանին պետք է վերադարձվեն յոթ շրջանները: Բացի այդ, ստատուս քվոն պետք է ամրագրվի տարածաշրջանում»,-հավելել է ՌԴ ղեկավարը:

Խոսելով հակամարտության մեջ Թուրքիայի դերի մասին, Պուտինը նշել է․ «Թուրքիայի դիրքորոշումը հիմնված է «Ադրբեջանի արդար գործի» պաշտպանության վրա: Անկարան պնդում էր վերադարձնել տարածքները Բաքվին»,-ավելացրել է ՌԴ նախագահը։

Ռուս առաջնորդը, հղում անելով այն փաստին, որ Հայաստանը չի ճանաչել Ղարաբաղի անկախությունը, ասել է, որ «միջազգային իրավունքի տեսանկյունից Ղարաբաղն Ադրբեջան է»։

«Հայաստանը չի ճանաչել Ղարաբաղը, միջազգային իրավունքի տեսանկյունից, դրանք ադրբեջանական տարածքներ են»,- ասել է Պուտինը:

Անդրադառնալով հակամարտության պատմությանը, ՌԴ նախագահը նշել է, որ հայերն առաջին արցախյան պատերազմի ժամանակ զենք էին վերցրել իրենց կյանքն ու արժանապատվությունը պաշտպանելու համար։

Միևնույն ժամանակ, խոսելով առկա իրավիճակից և Հադրութի շրջանում տեղի ունեցած վերջին սրացումից, Պուտինը հույս է հայտնել, որ դա եզակի դեպք կլինի և ասել է, որ կողմերը պետք է կանգ առնեն նոյեմբերի 10-ի դրությամբ առկա դիրքերում:

«Լեռնային Ղարաբաղի կարգավիճակը պետք է մնա անփոփոխ, այսինքն՝  հարցը պետք է տեղափոխվի ապագա, ֆիքսվի ստատուս քվոն, բայց Լեռնային Ղարաբաղի և Հայաստանի միջև կապի հնարավորության պարտադիր ստեղծմամբ, որի համար նախատեսվում էր ստեղծել այսպես կոչված Լաչինի միջանցք, այսինքն՝  կապի միջանցք Հայաստանի և Լեռնային Ղարաբաղի միջև», – բացատրել է նախագահը:

Ըստ նրա՝  գլխավորը արյունահեղությունը դադարեցնելն է: Մնացած հարցերը, ըստ Պուտինի, երկրորդական են:

«Մենք պայմանավորվել ենք, որ դադարեցվում են ռազմական գործողությունները ու պայմանավորվել ենք, որ կողմերը կանգնում են այն դիրքերում, որտեղ եղել են հայտարարության ստորագրման պահին: Սրա հետ կապված առաջացել են որոշակի տեխնիկական հարցեր, որոնք կապված են ենթակառուցվածքների հետ, ընդ որում՝ ինչպես Հայաստանի, այնպես էլ Ադրբեջանի համար: Սրանք պետք է լուծել հանգիստ` բանակցային գործընթացի ընթացքում, որովհետև եռակողմ հայտարարությունը տալիս է դրա բոլոր հնարավորությունները, քանի որ այնտեղ նշված է այն մասին, որ հրադադարի հաստատումից հետո պետք է տարածաշրջանում հարաբերությունների ամբողջական կայունացում լինի` տնտեսական ու ենթակառուցվածքային ապաշրջափակմամբ: Դա վերաբերում է նաև Նախիջևանին, Հայաստանի հարավին ու հյուսիսին: Այն բռնկումը` հրադադարի ռեժիմի խախտման, որը տեղի ունեցավ, հույս ունեմ, որ կլինի միակը և հնարավոր կլինի բոլոր պայմանավորված կողմերին նստեցնել բանակցությունների շուրջ»,- ասել է Պուտինը:

Նա նշել է, որ զինադադարի հասնելուց հետո հաջորդ փուլը պետք է լինի տարածաշրջանում խաղաղության հաստատումը, տնտեսական ներուժի բացահայտումը:

Ինչ վերաբերում է Ղարաբաղում խաղաղապահների թվի ավելացմանը, ապա դա հնարավոր է, բայց միայն բոլոր կողմերի հետ պայմանավորվածության դեպքում, հավելել է ՌԴ նախագահը:

Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։