Հայրենիքի փրկության ճակատի շարքերը համալրում են նոր կուսակցություններ. «Հրապարակ»
«Հրապարակ» թերթը գրում է. «Հայրենիքի փրկության ճակատը, որը փոխարինեց 16-17 կուսակցությունների ֆորմատին և, թվում է, պետք է ավելի քիչ թվով կուսակցություններ ընդգրկեր, որովհետև ոմանք հայտարարեցին դուրս գալու մասին, մեծացել է։
Մեզ ասացին, որ 22 կուսակցության մասին է խոսքը, չնայած մի մասը մարդ-կուսակցություններ են։ Երեկ շարժման համակարգող Իշխան Սաղաթելյանը դժվարացավ հստակ թիվ նշել, սակայն ասաց, որ ամեն օր իրենց շարքերը համալրվում են։ «17-ով մեկնարկել ենք շարժման ձևավորումը, դրանից հետո իսկապես մեզ միացողներ են եղել»,- ասաց նա։
Բայց 17-ից 3-ը կարծեմ լքել են միավորումը՝ Արամ Սարգսյանի Դեմկուսը, Տիգրան Ուրիխանյանի «Ալյանսը» և Հայկ Բաբուխանյանի ՍԻՄ-ը։ Սաղաթելյանը պատասխանեց. «Նրանց հեռանալուց հետո նույնքան կուսակցություն էլ միացել է, դրա համար եմ ասում՝ 17-ով ենք մեկնարկել շարժման ձևավորումը»:
