Նամակն այսօր կլինի Մոսկվայում. Անհետ կորած զինծառայողների ծնողները նամակ-խնդրագրով դիմել են ՌԴ իշխանություններին
Հայաստանում Ռուսաստանի դեսպանատան առջև իրենց բողոքի ձայնը բարձրացնող՝ անհետ կորած զինծառայողների ծնողները նամակ-խնդրագիր են փոխանցել ՌԴ իշխանություններին:
168.am-ի տեղեկացմամբ, Հայաստանում Ռուսաստանի դեսպանատան հյուպատոսական բաժնի ղեկավար, խորհրդական Անդրեյ Շանինի հետ հանդիպման մանրամասները լրագրողներին ու ներկաներին հայտնեց Եղիշե Զաքունցը, որի զարմիկը ևս անհետ կորածների թվում է.
«Կարդաց նամակը և ասաց, որ այս նամակին հենց հիմա ընթացք են տալու իրենք, փոխանցվելու է դա դեսպանին, և այսօր արդեն մի քանի ժամվա ընթացքում նամակը, որ գրել ենք խնդրանքով Վլադիմիր Վլադիմիրովիչին և ՌԴ-ին, այսօր լինելու է Մոսկվայում, և իրենք կանեն ամեն ինչ, որպեսզի աջակցեն մեզ:
Մեր խոսակցությունը եղել է ընդհանուր՝ գերիներ, անհետ կորածներ և զոհվածներ: Մենք նշեցինք, որ մեր խնդրանքն է, քանի որ իրենք կարող են ունենալ ազդեցություն, որպեսզի ազդեցություն ունենան Ադրբեջանի կառավարության վրա և կարողանան ինչ-որ կերպ իրենց խաղաղապահ զորքերին թողնել ներս»:
Անհետ կորած զինծառայողների հարազատները ՌԴ դեսպանատան մոտից քայլերթով շարժվեցին դեպի Կառավարություն՝ կրկին վարչապետի հետ հանդիպում պահանջելու համար: