ՄԱԿ-ը մտադիր է ականազերծման առաքելություն իրականացնել Լեռնային Ղարաբաղում
ՄԱԿ-ի ականազերծման ծառայությունը մտադիր է ականազերծման առաքելություն սկսել Լեռնային Ղարաբաղում: «ՌԻԱ Նովոստի» գործակալության տեղեկացմամբ, այս մասին հայտնել է ՄԱԿ-ի Խաղաղապահ գործողությունների վարչության ներկայացուցիչը:
«ՄԱԿ-ի ականազերծման ծառայությունը (UNMAS) համագործակցում է ՄԱԿ-ի այլ սուբյեկտների և դաշտային թիմի հետ շտապ տեղակայման ուղղությամբ ՄԱԿ-ից կողմերի հայցած օգնության համատեքստում: Հավանաբար այն կսկսվի դեկտեմբերի սկզբին՝ կարիքները գնահատելու առաքելությամբ»,- գործակալությանն ասել է ՄԱԿ-ի Խաղաղապահ գործողությունների վարչության ներկայացուցիչը:
Ավելի վաղ ՌԴ ԱԳ նախարար Սերգեյ Լավրովը հայտարարել էր, որ ակնկալվում է, որ ՄԱԿ-ի կառույցները, Կարմիր խաչի միջազգային կոմիտեն ևս կմիանան Ղարաբաղում հումանիտար խնդիրների լուծմանը:
Կարմիր Խաչն արդեն կայացրել է որոշում ԼՂ-ում իր ներկայացուցիչները թիվը 400-500-ով ավելացնելու, ինչպես նաև ֆինանսական աջակցությունը քառապատկելու մասին:
