Ալիևը շարունակում է կոշտ հռետորաբանությունը. նա բացառել է որևէ կարգավիճակ Լեռնային Ղարաբաղի համար
Լեռնային Ղարաբաղում պատերազմի դադարեցման մասին հայտարարությունից և հակամարտության գոտում ռուս խաղաղապահների տեղակայումից հետո էլ Ադրբեջանի նախագահ Իլհամ Ալիևը շարունակում է կոշտ հռետորաբանությունը: Չնայած ռուսական կողմից հնչող հայտարարություններին, որ Ռուսաստանի, Հայաստանի և Ադրբեջանի նախագահների եռակողմ հայտարարությունը հակամարտության երկարատև, Հայաստանի ու Ադրբեջանի ժողովուրդների համար արդար կարգավորման հիմքեր է ստեղծում՝ Ադրբեջանի նախագահը հայտարարել է, թե Լեռնային Ղարաբաղի որևէ կարգավիճակի մասին խոսք գնալ չի կարող:
Ինչպես հաղորդում է «Արմենպրես»-ը, Ալիևը նման հայտարարությամբ է հանդես եկել Ադրբեջանի ժողովրդին հղած ուղերձի ընթացքում:
Նա նշել է, որ մեկ անգամ չէ, որ ասել է, որ Ադրբեջանի տարածքային ամբողջականությունը չի կարող բանակցությունների առարկա դառնալ:
ՌԴ նախագահ Վլադիմիր Պուտինը ԲՌՀՉՀ-ի երկրների (Բրազիլիա, Ռուսաստան, Հնդկաստան, Չինաստան, Հարավաֆրիկյան Հանրապետություն) ղեկավարների գագաթնաժողովում հայտարարել է, որ ԼՂ-ում պատերազմի դադարեցման մասին եռակողմ հայտարարությունը և դրանում ամրագրված պայմանավորվածությունների պահումը պայմաններ են ստեղծել ճգնաժամի երկարաժամկետ և լայնաֆորմատ կարգավորման համար, ընդ որում՝ արդար հիմքի վրա ինչպես Հայաստանի, այնպես էլ Ադրբեջանի ժողովուրդների համար:
